Quba şəhəri ilk dəfə olaraq “Türk Dövlətləri Təşkilatı Modeli 2026” beynəlxalq gənclər düşərgəsinə ev sahibliyi edib. Layihə Ədliyyə Nazirliyi və Gənclər və İdman Nazirliyinin təşkilati dəstəyi, “Ədliyyə Könüllüləri” İctimai Birliyinin təşəbbüsü ilə reallaşdırılıb.
Türk Dövlətləri Təşkilatının fəaliyyət prinsiplərinin, əməkdaşlıq mexanizmlərinin və qərar qəbuletmə proseslərinin gənclər arasında daha geniş tanıdılmasını hədəfləyən düşərgə müxtəlif türk dövlətləri və regionlarından olan iştirakçıları vahid platformada bir araya gətirib. Proqram çərçivəsində gənclərin diplomatiya, beynəlxalq münasibətlər, liderlik, ictimai çıxış, dövlət idarəçiliyi və strateji qərarvermə sahələrində bilik və bacarıqlarının inkişafına xüsusi diqqət yetirilib.
Gənclər diplomatik simulyasiyada iştirak ediblər
Açılış mərasimində çıxış edən rəsmi şəxslər layihənin Türk dünyası gəncləri arasında inteqrasiyanın gücləndirilməsi, ortaq dəyərlərin təşviqi və gələcək liderlərin formalaşdırılması baxımından mühüm əhəmiyyət daşıdığını vurğulayıblar.
Düşərgənin əsas hissəsini Türk Dövlətləri Təşkilatının fəaliyyət modelini əks etdirən genişmiqyaslı simulyasiya təşkil edib. İştirakçılar müxtəlif dövlət qurumlarının, nazirliklərin, komitələrin, media və vətəndaş cəmiyyəti institutlarının nümayəndələri rolunda çıxış edərək çoxtərəfli müzakirələr aparıblar. Onlar əməkdaşlığın genişləndirilməsinə yönəlmiş təşəbbüslər hazırlayıb, müxtəlif istiqamətlər üzrə memorandum layihələri üzərində çalışıblar.
Proqram müddətində “Türk dünyasında gənclərin rolu”, “Müasir idarəçilik və regional əməkdaşlıq”, “Beynəlxalq danışıqlar və qərarvermə mexanizmləri” kimi mövzular ətrafında panel sessiyaları, təlimlər və ekspert görüşləri keçirilib. İştirakçılar həmçinin deputatlar və dövlət qurumlarının nümayəndələri ilə görüşərək siyasi, hüquqi, iqtisadi və humanitar əməkdaşlığın perspektivlərini müzakirə ediblər.
Ortaq memorandum qəbul edildi
Düşərgənin yekununda iştirakçılar tərəfindən Türk dövlətləri arasında əməkdaşlığın daha da genişləndirilməsinə dair ortaq memorandum hazırlanaraq qəbul olunub. Sənəddə təhsil, gənclər siyasəti, hüquq, rəqəmsal transformasiya, media, mədəniyyət və vətəndaş cəmiyyəti sahələrində əməkdaşlığın gücləndirilməsi ilə bağlı təkliflər əks olunub.
Layihə yalnız təlim və simulyasiyalarla məhdudlaşmayıb. Düşərgə çərçivəsində türk xalqlarının milli-mədəni irsini tanıdan sərgilər, konsert proqramları, idman yarışları, komanda quruculuğu tədbirləri və mədəni mübadilə fəaliyyətləri də təşkil edilib.
Bağlanış mərasimində layihə ərzində əldə olunan nəticələr təqdim olunub, iştirakçıların təşəbbüsləri qiymətləndirilib və gələcək əməkdaşlıq imkanları müzakirə edilib. Tədbirin sonunda gənclərə sertifikatlar təqdim olunub, fərqlənən komandalar və iştirakçılar müxtəlif nominasiyalar üzrə mükafatlandırılıblar.
Təşkilatçıların fikrincə, “Türk Dövlətləri Təşkilatı Modeli 2026” düşərgəsi Türk dünyası gəncləri arasında əlaqələrin möhkəmlənməsinə, ortaq dəyərlərin təşviqinə və yeni lider nəslinin formalaşmasına xidmət edən önəmli platformalardan biri kimi yadda qalıb.
