Fransanın məşhur müğənnisi və aktyoru Patrik Bryuel bir neçə qadına qarşı cinsi zorakılıq iddiaları ilə bağlı saxlanılıb və dindirilmək üçün Parisdə məhkəmə polisinin bölməsinə aparılıb.
Franceinfo-nun Fransa Prokurorluğuna istinadən yaydığı məlumata görə, 67 yaşlı sənətçi ən azı 13 qadının irəli sürdüyü zorlanma və cinsi təcavüz ittihamları ilə bağlı ifadə verəcək.
İstintaq uzun illəri əhatə edir
Məlumata əsasən, prokurorluq Bryueli 1997–2012-ci illər arasında baş verdiyi iddia olunan hadisələr üzrə dindirəcək. Eyni zamanda hüquq-mühafizə orqanları tərəfindən digər mümkün cinsi zorakılıq şikayətləri də araşdırılır.
Patrik Bryuel ona qarşı səsləndirilən bütün ittihamları qəti şəkildə rədd edir. Müğənninin vəkili bildirib ki, onun müdafiə etdiyi şəxs istintaqla əməkdaşlıq edəcək və günahsızlığını sübut etmək üçün bütün lazımi məlumatları təqdim edəcək.
“Patrik Bryuel müstəntiqlərin bütün suallarını cavablandıracaq və günahsız olduğunu sübut etmək üçün zəruri olan bütün məlumatları təqdim edəcək”, – vəkil açıqlamasında qeyd edib.
Turnenin böyük hissəsi ləğv edilib
Fransa qanunvericiliyinə əsasən, Bryuel polis nəzarətində maksimum 48 saat saxlanıla bilər. Bu müddət başa çatdıqdan sonra onun sərbəst buraxılması və ya məhkəməyə göndərilməsi ilə bağlı qərar veriləcək.
Qalmaqal fonunda sənətçi iyunun 16-da Parisdə başlaması nəzərdə tutulan və Fransa, İsveçrə, Belçika ilə Kanadanı əhatə edən turnesinin böyük hissəsini ləğv edib.
May ayının ortalarında Fransa hökumətinin sözçüsü Mod Brejon da qadınları illər keçsə belə cinsi zorakılıq halları barədə danışmağa çağırmışdı.
“O, bildirib ki, ictimai müzakirələrdə qadınları, hətta hadisədən onilliklər sonra belə, danışmağa təşviq edən aydın mesajlar verilməlidir. Cəmiyyət və ədliyyə sistemi onların səsinin eşidilməsi üçün lazımi şəraiti yaratmalıdır”, – deyə Brejon vurğulayıb.
