Son günlər Yer ətrafında geomaqnit vəziyyət sabit olaraq qalır və mütəxəssislərin qiymətləndirməsinə görə, həftəsonu da ciddi maqnit qasırğaları gözlənilmir. Bununla belə, Günəşdə müşahidə olunan son aktivlik səbəbindən qısamüddətli dəyişikliklərin baş verməsi ehtimalı tam istisna edilmir.
Alimlərin məlumatına görə, yaxın günlərdə koronal dəliyin təsiri nəticəsində Günəş küləyinin sürətində müəyyən artım müşahidə oluna bilər. Bunun fonunda geomaqnit sahəsində qısa müddətli aktivlik qeydə alınsa da, ümumi vəziyyətin əsasən sakit qalacağı proqnozlaşdırılır.
Günəşdə yeni aktivlik müşahidə olunub
Müşahidələr göstərir ki, iyunun 19-u səhər saatlarında Günəş səthində filament püskürməsi baş verib. Eyni zamanda kiçik həcmli koronal kütlə atılmasının da mümkün olduğu bildirilir. Lakin mövcud hesablamalar bu hadisələrin Yerə təsirinin məhdud olacağını və güclü maqnit qasırğasına səbəb olmayacağını göstərir.
Kosmik hava üzrə mütəxəssislər qeyd edirlər ki, hazırkı göstəricilər geomaqnit aktivliyin aşağı səviyyədə qalacağını deməyə əsas verir. Buna görə də meteohəssas insanlar üçün ciddi risklər gözlənilmir.
Bir neçə ay əvvəl qeydə alınan güclü geomaqnit hadisələrindən fərqli olaraq, hazırkı vəziyyət daha sabit xarakter daşıyır. Buna baxmayaraq, alimlər Günəş aktivliyini fasiləsiz izləməyə davam edirlər.
Tədqiqatçılar ötən il qeydə alınmış güclü X9 sinifli Günəş alışmasını araşdırarkən maraqlı nəticə əldə ediblər. Məlum olub ki, hadisədən təxminən üç saat əvvəl Günəş atmosferində plazmanın parlaqlığı, hərəkət sürəti və turbulentlik səviyyəsi artmağa başlayıb.
Araşdırmaya görə, alışmadan 15-20 dəqiqə əvvəl bu qeyri-sabitlik daha da güclənib. Alimlər hesab edirlər ki, belə əlamətlərin vaxtında aşkarlanması gələcəkdə kosmik hava hadisələri üçün erkən xəbərdarlıq sistemlərinin yaradılmasına kömək edə bilər.
