DÇ-2026-nın ikinci turunda azarkeşlər həm dramatik heç-heçə, həm də məhsuldar qarşılaşmaya şahid olublar. A qrupunda Çexiya qələbəyə çox yaxın olsa da, son dəqiqələrdə xal itirib. B qrupunda isə İsveçrə son hissədə rəqibini üstələyərək inamlı qələbə qazanıb.
A qrupunun ikinci turunda Çexiya və Cənubi Afrika yığmaları Atlantadakı “Mercedes-Benz Stadium”da münasibətlərinə aydınlıq gətiriblər. Oyuna daha fəal başlayan çexlər erkən qolla hesabda önə keçərək matça istədikləri kimi start veriblər.
Sadilekin vurduğu qol uzun müddət Çexiyaya üstünlük qazandırsa da, komanda bu hesabı sona qədər saxlaya bilməyib. Qarşılaşmanın son bölümündə hakim Cənubi Afrikanın xeyrinə penalti təyin edib. Mokoena şansını qaçırmayaraq topu qapıdan keçirib və görüşün 1:1 hesabı ilə başa çatmasına səbəb olub.
DÇ-2026. A qrupu, II tur
İsveçrə son dəqiqələrdə rəqibini darmadağın etdi
B qrupunda baş tutan İsveçrə – Bosniya və Herseqovina oyunu isə tamam fərqli ssenari üzrə inkişaf edib. İnglvuddakı “SoFi Stadium”da keçirilən qarşılaşmada uzun müddət hesab açılmasa da, son dəqiqələr əsl futbol tamaşasına çevrilib.
İsveçrə millisi 74-cü dəqiqədən sonra oyunun gedişatını tam nəzarətə götürüb. Matçın əsas qəhrəmanı dubla imza atan Joan Manzambi olub. Ruben Varqas və Qranit Caka da fərqlənənlər sırasına qoşulublar. Bosniya və Herseqovinanın təsəlli qolunu isə Ermin Mahiç vurub.
Balkan təmsilçisinin vəziyyəti 80-ci dəqiqədə daha da çətinləşib. Tarik Muharemoviç birbaşa qırmızı vərəqə alaraq komandasını azlıqda qoyub. Say üstünlüyündən maksimum yararlanan İsveçrə yığması ardıcıl qollarla hesab arasındakı fərqi artırıb və nəticədə 4:1 hesablı parlaq qələbə qazanaraq qrupda vacib üç xal əldə edib.
DÇ-2026. B qrupu, II tur
