Yaponiyada əlverişsiz hava şəraiti ölkənin bir sıra bölgələrində həyatı ciddi şəkildə çətinləşdirib. Güclü leysanlar, tropik qasırğanın təsiri və torpaq sürüşməsi riski səbəbindən hakimiyyət orqanları Kyusyu, Okinava və Kinki bölgələri də daxil olmaqla 13 prefekturada yaşayan 2,23 milyondan çox sakinə təxliyə çağırışı edib.
Bir sıra yaşayış məntəqələrində evlər su altında qalıb, nəqliyyatın hərəkətində fasilələr yaranıb və təhlükəsizlik tədbirləri gücləndirilib. Yaponiya Meteorologiya Agentliyi yaxın saatlarda qərb və şərq bölgələrində yağıntıların daha da intensivləşə biləcəyi barədə xəbərdarlığını davam etdirir.
Leysanlar və torpaq sürüşməsi təhlükəsi artır
Məlumata görə, Kaqoşima prefekturasında azı üç nəfər xəsarət alıb, Fukuoka və Kaqoşimada isə 25 yaşayış binasını su basıb. Tyuqoku bölgəsi və şimali Kyusyunun bəzi rayonlarında torpaq sürüşməsi ilə bağlı dördüncü səviyyəli təhlükə elan olunub.
Meteoroloqlar bildirirlər ki, mövsümi yağış cəbhəsi ilə tropik sistemlərin birləşməsi çayların daşması və sel riskini əhəmiyyətli dərəcədə artırır. Bəzi reyslər ləğv edilib, dəmir yolu və avtomobil yollarında da məhdudiyyətlər tətbiq olunub.
Tokio yaxınlığında zəlzələ də qeydə alınıb
Təbiət hadisələri bununla da yekunlaşmayıb. Tokio yaxınlığındakı Tiba prefekturasında 5,8 maqnitudalı zəlzələ baş verib. Yeraltı təkanların ocağı təxminən 50 kilometr dərinlikdə yerləşib və sarsıntılar paytaxt Tokioda da hiss olunub. İlk dəqiqələrdə sunami təhlükəsi barədə xəbərdarlıq verilsə də, vəziyyət qiymətləndirildikdən sonra bu xəbərdarlıq ləğv olunub.
Hazırda dağıntı və ya insan tələfatı barədə rəsmi məlumat yoxdur. Xatırladaq ki, bir gün əvvəl Yaponiyada 7,2 maqnitudalı zəlzələ baş vermiş, hadisə nəticəsində 10 nəfər müxtəlif dərəcəli xəsarətlər almışdı.
