Aksiyon filmlərinin ulduzu Ceyson Steytem baş rolda oynadığı yeni “Mutiny” (“Qiyam”) filmi ilə yenidən böyük ekrana qayıdır. Lionsgate filmin final treylerini təqdim edib və yeni görüntülər ekran işində tamaşaçıları gərgin döyüş səhnələri, detektiv elementləri və yüksək tempin gözlədiyini göstərir. Artıq bir sıra kino tənqidçiləri filmi qapalı məkanda cərəyan edən gərgin süjetinə görə məşhur “Die Hard” (“Möhkəm qoz”) seriyası ilə müqayisə edirlər.
Filmin mərkəzində keçmiş xüsusi təyinatlı və Nyu-York polisinin sabiq əməkdaşı Koul Rid dayanır. O, milyarder işəgötürəni Tibunun qətlinin şahidi olduqdan sonra cinayətdə günahlandırılır. Adını təmizləməyə çalışan Rid nəhəng konteyner gəmisində özünü beynəlxalq cinayət şəbəkəsinin mərkəzində tapır və sağ qalmaq uğrunda ölümcül mübarizəyə başlayır.
Güclü aktyor heyəti və tanınmış yaradıcı komanda
Filmdə Ceyson Steytemlə yanaşı Annabell Uollis, Ceyson Vonq, Roland Möller, Arnas Fedaraviçyus, Çaneil Kular və Adrian Lester də rol alıblar. Layihənin rejissoru daha əvvəl Steytemlə “Plane” filmi üzərində çalışan Jan-Fransua Rişedir. Ssenari isə Lindsi Mişel və J.P. Devis tərəfindən qələmə alınıb.
“Mutiny” Steytem üçün növbəti aktyor işi olmaqla yanaşı, onun Punch Palace Productions şirkətinin prodüser kimi iştirak etdiyi layihələrdən biridir. Filmin istehsalında həmçinin MadRiver Pictures də yer alıb. Ekran əsərinin çəkilişləri Böyük Britaniyada həyata keçirilib.
Final treylerdən görünür ki, hadisələrin əsas hissəsi açıq dənizdə üzən yük gəmisində baş verir. Qəhrəman həm muzdlu silahlılarla üz-üzə gəlir, həm də onu cinayətdə günahlandıran böyük beynəlxalq sui-qəsdin izinə düşür. Filmin müddəti 95 dəqiqə olacaq və o, aksiyon, triller və detektiv janrlarını bir araya gətirəcək. Premyeranın 21 avqust 2026-cı ildə baş tutacağı təsdiqlənib.
