Azərbaycanda məktəbəqədər təhsil sahəsində yeni maliyyələşmə mexanizmi tətbiq olunacaq. Nazirlər Kabinetinin təsdiqlədiyi yeni qaydalara əsasən, valideyn, dövlət və özəl sektorun əməkdaşlığına əsaslanan model çərçivəsində lisenziyalı özəl uşaq bağçalarında təhsil alan uşaqların təhsil haqqının 70 faizə qədər hissəsi dövlət tərəfindən maliyyələşdiriləcək. Yeni sistem məktəbəqədər təhsilin daha əlçatan olmasını və özəl sektorun imkanlarından daha səmərəli istifadə edilməsini hədəfləyir.
Qaydalara əsasən, dövlət dəstəyinin aylıq məbləği Bakıda maksimum 350 manat, digər şəhər və rayonlarda isə 250 manatadək müəyyən edilib. Təhsil haqqının qalan hissəsi valideynlər tərəfindən ödəniləcək. Maliyyələşmə yalnız layihəyə qoşulan və müvafiq tələblərə cavab verən özəl məktəbəqədər təhsil müəssisələrinə şamil olunacaq.
Müsabiqədə yalnız lisenziyalı bağçalar iştirak edəcək
Yeni mexanizm çərçivəsində Elm və Təhsil Nazirliyi hər il müsabiqə elan edəcək. Müsabiqəyə yalnız “Lisenziyalar və icazələr haqqında” qanuna uyğun fəaliyyət göstərən lisenziyalı özəl məktəbəqədər təhsil müəssisələri buraxılacaq. Qiymətləndirmə mərhələsini uğurla keçən bağçalarla maliyyələşmə müqavilələri bağlanacaq və həmin müqavilələr əsasında qəbul edilən uşaqlara dövlət dəstəyi veriləcək.
Bundan əlavə, layihənin icra müddəti 10 aydan artıq olmayacaq və maliyyələşmə dövlət büdcəsindən Elm və Təhsil Nazirliyi üçün ayrılan vəsait hesabına təmin ediləcək. Nazirlik yaxın vaxtlarda müsabiqənin elan olunacağı tarix, müraciət proseduru və qiymətləndirmə meyarları barədə ictimaiyyətə əlavə məlumat təqdim edəcək.
Məqsəd məktəbəqədər təhsilin əhatəsini genişləndirməkdir
Elm və Təhsil Nazirliyinin məlumatına görə, yeni model son illərdə həyata keçirilən qrant proqramlarının və icma əsaslı məktəbəqədər təhsil layihələrinin uğurlu nəticələrinin davamı kimi hazırlanıb. Məqsəd daha çox uşağın keyfiyyətli məktəbəqədər təhsilə cəlb olunması, valideynlərin seçim imkanlarının artırılması və dövlət-özəl tərəfdaşlığının uzunmüddətli əsasda inkişaf etdirilməsidir. Bu yanaşmanın məktəbəqədər təhsilin əlçatanlığını artıracağı və özəl bağçaların potensialından daha səmərəli istifadəyə imkan yaradacağı gözlənilir.
