Bakıdan olan tanınmış stilist Vlad Lisovets, haqqında yayılan “xərçəngin gec mərhələsində olması” ilə bağlı iddialara cavab verib.
Bu barədə o, şəxsi Telegram kanalında paylaşım edib. 52 yaşlı stilist xardal rəngli kostyumda çəkilmiş fotosessiyasını nümayiş etdirərək, səhhətinə görə narahatlıq keçirən pərəstişkarlarına təşəkkür edib və hazırda vəziyyətinin yaxşı olduğunu bildirib. O, sağlamlıq problemlərinin olduğunu inkar etməsə də, onların vəziyyətinin ağır olması ilə bağlı xəbərləri təkzib edib.
“Mənə, paylaşımlarıma və son səfərlərimə baxın – hər şey yazıldığı və bəzi insanların istədiyi qədər pis deyil“, – deyə Lisovets qeyd edib.
Bundan əvvəl Telegram-kanal Mash, Lisovetsin sağalmaz bir xəstəlik diaqnozu ala biləcəyini və xərçəngə tutulduğunu iddia etmişdi.
Lisovetsin müalicə prosesi və ailəsinin reaksiyası
Rusiya mediasının məlumatına görə, stilistə 2024-cü ilin payızında xərçəng diaqnozu qoyulub və o, kimyaterapiya kursuna başlayıb. Ancaq müalicə gözlənilən effekti verməyib və həkimlər hazırda növbəti mərhələdə hansı addımların atılacağını müəyyən etmək üçün konsilium təşkil etməyə hazırlaşırlar. Jurnalistlər bildirirlər ki, tibbi ekspertlər Lisovetsi sağalmaz xəstə elan edə bilərlər.
Xatırladaq ki, Vlad Lisovets Bakı şəhərində, dəmiryolçu ailəsində doğulub. O, 1994-cü ildə Moskvaya köçərək, “Ostankino” televiziya mərkəzində çalışıb və tanınmış musiqiçilərin stilisti kimi fəaliyyət göstərib.
Məşhur stilist həmçinin yaxınlarının xəstəlik xəbərinə reaksiyasından bəhs edib. O, Telegram kanalında paylaşım edərək 80 yaşlı anasının bu xəbəri çox ağır keçirdiyini vurğulayıb.
“İndi bizim öz pozitiv guşəmiz var. Çətin bir gündən sonra, xüsusilə anam üçün ağır olan bu günün ardından, sizin mesajlarınızı oxuyuram və ruhum isinir“, – deyə Lisovets izləyicilərinə təşəkkür edib.
Sonda stilist izləyicilərinin dəstəyinə minnətdarlığını bildirərək postunu belə yekunlaşdırıb: “Sözlə sağaltmaq – əsl müalicə budur.”
