16 aprel tarixində UEFA Çempionlar Liqasının 1/4 final mərhələsinin son cavab oyunları baş tutdu. Bu görüşlərin nəticələri ilə 2024/25 mövsümünün dörd yarımfinalçısı tam şəkildə müəyyənləşdi.
Milanın “İnter” klubu doğma meydanda “Bavariya” ilə məhsuldar heç-heçəyə razılaşdı – 2:2. İlk oyunda almanları 2:1 hesabı ilə məğlub edən italiyalılar bu nəticə ilə növbəti mərhələyə yüksəldilər.
Digər qarşılaşmada Madridin “Real” klubu doğma “Santyaqo Bernabeu” stadionunda London “Arsenal”ını qəbul etdi. İlk görüşdə 0:3 hesablı məğlubiyyətdən sonra “qalaktikos” revanş ala bilmədi – cavab görüşü də 1:2 hesablı məğlubiyyətlə başa çatdı.
Beləliklə, “Real Madrid” 2019/20 mövsümündən sonra ilk dəfə yarımfinal mərhələsinə yüksələ bilmədi. Əvəzində “Arsenal” uzun fasilədən sonra – 2008/09 mövsümündən bəri ilk dəfə yarımfinala adladı.
Xatırladaq ki, əvvəlki gün baş tutan oyunlarda “Aston Villa” “PSJ” üzərində 3:2 hesablı qələbə qazansa da, ilk oyundakı 1:3 hesablı məğlubiyyət səbəbindən fransızlar mərhələ adladı. Eyni şəkildə, “Barselona” səfərdə “Borussiya Dortmund”a 1:3 uduzmasına baxmayaraq, ilk görüşdəki 4:0 hesablı üstünlüyü sayəsində yarımfinal bileti qazandı.
2024/25 mövsümünün Çempionlar Liqası yarımfinal cütlükləri:
- PSJ – Arsenal
- Barselona – İnter
📅 Yarımfinal matçlarının ilk oyunları 29 və 30 aprel, cavab qarşılaşmaları isə 6 və 7 may tarixlərində keçiriləcək.
🏟 Final 31 may 2025-ci ildə Münhendə, “Allianz Arena”da baş tutacaq.
