İran İsraillə atəşkəs və ABŞ-la nüvə proqramı üzrə danışıqlara başlamağa hazır olmadığını bəyan edib. Tərəf rəsmi şəkildə Qətər və Oman vasitəçilərinə bildirib ki, aktiv hərbi əməliyyatlar fonunda heç bir danışıqlardan söhbət gedə bilməz.
Bu barədə The Times of Israel məlumat yayıb.
Təbrizin açıqlamasında qeyd olunur ki, İsrailin “önləyici zərbələrinə cavab tam başa çatmadan” diplomatik danışıqlara keçid olmayacaq. İranın mövqeyi aydındır: sülh təşəbbüsləri yalnız hərbi əməliyyatların dayandırılmasından sonra gündəmə gələ bilər.
İsrailin İranın nüvə obyektlərinə hücumu və Tehran cavabı
13 iyun gecəsi və səhəri İsrail Müdafiə Ordusu (CAXAL) İran ərazisində yerləşən nüvə və hərbi obyektlərə hava hücumları həyata keçirib. Məlumata görə, əməliyyatda 200 qırıcı təyyarə iştirak edib, 330-dan çox müxtəlif tipli sursat atılıb, 100-dən artıq hədəf məhv edilib.
İsrail bu zərbələri “dəqiq profilaktik hücumlar” adlandırıb. Baş nazir Benyamin Netanyahunun sözlərinə görə, “Aslan xalq” adlı əməliyyatın əsas məqsədi İranın nüvə infrastrukturu, ballistik raket zavodları və digər hərbi güc mərkəzlərini sıradan çıxarmaqdır. Netanyahu bəyan edib ki, İran artıq doqquz nüvə başlığı istehsal etməyə kifayət qədər zənginləşdirilmiş urana malikdir.
İran isə 13 iyun axşamı cavab hücumuna başlayıb. İsrailə qarşı dörd dalğada raket atəşi açılıb. Nəticədə ölkə ərazisində üç nəfər həlak olub, 80-dən çox insan yaralanıb.
15 iyuna keçən gecə isə İrandan atılan raketlər Bat-Yam (Tel-Əviv yaxınlığı) və Tamra (Hayfa yaxınlığı) şəhərlərinə düşüb. Hücumlar nəticəsində 13 nəfər həyatını itirib, yüzlərlə insan yaralanıb. Ölənlər arasında üç azyaşlı uşaq da var.
