İsrail Silahlı Qüvvələri 13 iyun gecəsi İrana aviazərbələr endirib. Hücum nəticəsində Tehranda və bir neçə şəhərdə partlayış səsləri eşidilib, hava hücumundan müdafiə sistemləri işə salınıb. Bu barədə “Daylinews-az.com” “Axios” və “The Times of Israel”ə istinadla xəbər verir.
Hücumun detallarını İsrail təsdiqlədi
İsrail ordusu “Aslan xalqı” (Lion’s Nation) adlı əməliyyat çərçivəsində İranın müxtəlif bölgələrində yerləşən nüvə və hərbi obyektlərə zərbələr endirdiyini açıqlayıb.
İsrail hərbçiləri bildiriblər ki, İran qısa müddət ərzində bir neçə nüvə bombası hazırlamaq üçün kifayət qədər zənginləşdirilmiş urana malikdir və bu səbəbdən əməliyyat qaçılmaz olub.
ABŞ kənarda qalır
ABŞ dövlət katibi Marko Rubio hadisəyə reaksiya verərək qeyd edib: “Bu axşam İsrail İrana qarşı birtərəfli addım atdı. Biz bu hücumda iştirak etmirik. Əsas prioritetimiz regiondakı Amerika qüvvələrinin təhlükəsizliyidir.”
İsraildə fövqəladə vəziyyət
İsrailin müdafiə naziri İsraël Kaats ölkə üzrə fövqəladə vəziyyət elan edib. Onun sözlərinə görə, ölkə yaxın saatlarda İranın raket və pilotsuz uçuş aparatları ilə cavab hücumuna məruz qala bilər.
Təl-Əviv də daxil olmaqla bir çox şəhərdə hava həyəcan siqnalları səsləndirilib. Ordunun arxa cəbhə komandanlığı təhsil müəssisələrinin fəaliyyətini və ictimai toplaşmaları dayandırıb, vətəndaşları yalnız əsas sahələrdə işləməyə çağırıb.
Hərbi komandanlıq yaxın saatlarda İran tərəfindən “şərqdən ciddi zərbə” ola biləcəyi barədə xəbərdarlıq edib.
Netanyahu nazirlərlə fövqəladə toplantı keçirdi
İsrail baş naziri Benyamin Netanyahu təhlükəsizlik kabinetinin fövqəladə toplantısını çağırıb və videomüraciət yayımlayıb. O bildirib ki, əməliyyat lazım olduğu qədər davam edəcək: “Məqsədimiz İranın nüvə infrastrukturu, ballistik raket istehsalı zavodları və hərbi gücünü zəiflətməkdir.”
Qeyd olunur ki, bu, əməliyyatın yalnız ilk mərhələsidir və o, bir neçə gün davam edə bilər. İsrail artıq on minlərlə ehtiyatda olan hərbçini səfərbər edib.
İrana endirilən zərbələrin nəticələri
İran və İsrail mətbuatının yaydığı məlumata görə, hücum nəticəsində Tehrandan əlavə Nətənz, Xorrəməbad və Hamedan şəhərləri də hədəf alınıb. Bu şəhərlərdə nüvə obyektlərinin yerləşdiyi bildirilir.
Bundan əlavə, Piranşəhrdəki raket bazasına endirilən zərbə nəticəsində bir neçə güclü partlayış baş verib.
İsrailin ikinci hava hücum dalğası başladığı bildirilir. İranın dövlət televiziyası təsdiqləyib ki, Nətənzdəki zənginləşdirmə obyekti bir neçə dəfə hədəf alınıb.
İran mediası yazır ki, hava zərbələri nəticəsində SEPAH-ın komandanı Hüseyn Səlami, İran Ordusunun Baş Qərargah rəisi Məhəmməd Baqeri və bir neçə yüksək səviyyəli nüvə alimi həlak olub.
ABŞ və İran arasında danışıqlar və Trampın reaksiyası
ABŞ və İran arasında aylardır davam edən nüvə danışıqları dalana dirənib. Vaşinqtonun əsas tələbləri: uranın zənginləşdirilməsindən imtina, uzaqmənzilli raketlərin istehsalının dayandırılması və ABŞ müfəttişlərinin obyektlərə buraxılmasıdır. İran tərəfi isə “nüvə hüquqlarından” imtina etməyəcəyini bildirir.
ABŞ-ın sabiq prezidenti Donald Tramp Fox News-a bildirib: “İranın nüvə bombasına sahib olmasına icazə verə bilmərik. Əgər lazım olsa, ABŞ özünü və İsraili müdafiə etməyə hazırdır. Biz danışıqlar masasına qayıtmağa ümid edirik. Amma rəhbərlikdəki bəzi şəxslər buna artıq qayıtmayacaq.”
