Azərbaycan ali təhsil tarixində ilk dəfə olaraq altı universitet dünyanın ən yaxşı 1000 universiteti sırasına daxil edilib. Bu barədə Elm və Təhsil Nazirliyi məlumat yayıb.
Daylinews-az.com xəbər verir ki, “QS 2026 Dünya Universitetləri Reytinqi”ndə ümumilikdə doqquz Azərbaycan universiteti yer alıb və bu, ölkənin ali təhsil sistemində mühüm dönüş nöqtəsi sayılır.
İlk dəfə TOP 1000-ə daxil olan universitetlər:
- Azərbaycan Texniki Universiteti (851–900)
- Bakı Mühəndislik Universiteti (901–950)
- Xəzər Universiteti (951–1000)
Reytinqdə mövqeyini əhəmiyyətli dərəcədə yaxşılaşdıranlar:
- Bakı Dövlət Universiteti (BDU) — 688-ci pilləyə yüksəlib (təxminən 300 pillə irəliləyiş)
- Azərbaycan Dövlət İqtisad Universiteti (UNEC) — 801–850 aralığına daxil olub
- Azərbaycan Dövlət Neft və Sənaye Universiteti (ADNSU) — 851–900 aralığında qərarlaşıb
Reytinqə ilk dəfə daxil olan digər universitetlər:
- Azərbaycan Memarlıq və İnşaat Universiteti (1001–1200)
- Sumqayıt Dövlət Universiteti (1001–1200)
- ADA Universiteti (1201–1400)
Qeyd olunur ki, Azərbaycan bu nəticə ilə 106 ölkə arasında reytinqə ən çox yeni universitet daxil edən ikinci ölkə olub.
Reytinq aşağıdakı indikatorlara əsasən tərtib olunub:
- Akademik nüfuz
- İşəgötürənlərin rəyi
- Müəllim–tələbə nisbəti
- Əcnəbi müəllim və tələbə payı
- Məzunların məşğulluq göstəriciləri
Bütün bu sahələrdə Azərbaycan universitetlərinin göstəricilərində müsbət dinamika müşahidə olunub.
Sonda qeyd edilir ki, Azərbaycan Cənubi Qafqaz regionunda lider mövqeyini möhkəmləndirib — ölkənin reytinqə daxil olan universitetlərinin sayı digər iki qonşu ölkənin ümumi sayını üç dəfə üstələyir.
