Amerikada ciddi rezonansa səbəb olan hadisə baş verib: “The Atlantic” jurnalının baş redaktoru Ceffri Qoldberq Donald Trampın administrasiyasının yüksək rütbəli rəsmiləri üçün yaradılmış xüsusi Signal çatına təsadüfən əlavə olunub. Həmin qrupda ABŞ-ın Yəməndəki husilərə qarşı mümkün hərbi zərbələri ilə bağlı məxfi planları müzakirə olunub. Ağ Ev bu insidenti təsdiqləyib və Trampın milli təhlükəsizlik üzrə müşaviri Mayk Uoltsun vəzifədən uzaqlaşdırıla biləcəyi istisna edilmir.
Hadisənin detalları
11 martda jurnalist Ceffri Qoldberq “Michael Waltz” adlı istifadəçidən Signal qrupuna qoşulmaq üçün dəvət aldı. Qısa müddət sonra o, “Houthi PC small group” adlı qapalı söhbət otağına əlavə edildi. Qrupda ABŞ administrasiyasının yüksək səviyyəli üzvləri — vitse-prezident Vens, dövlət katibi Marko Rubio, milli kəşfiyyat direktoru Talsi Qabbard və elə həmin Uolts da var idi.
Nə müzakirə olunurdu?
Qoldberqin sözlərinə görə, çatda çox məxfi məlumatlar paylaşılıb:
- ABŞ-ın Yəməndə planlaşdırdığı zərbələrin koordinatları və məqsədləri
- Tətbiq ediləcək silahların növləri
- Əməliyyatların vaxtı və mərhələləri
- Vaşinqtonun region üzrə hərbi strategiyası
Jurnalist əvvəlcə bu çatın real olduğuna inanmayıb. Lakin daha sonra söhbətə tanınmış rəsmilərin qoşulduğunu və orada konkret taktiki məlumatların yer aldığını görüb, bu söhbətin əslində gizli hökumət kanalı olduğunu anlayıb.
Ağ Evin reaksiyası
Milli Təhlükəsizlik Şurasının sözçüsü insidentin təsadüfi olduğunu təsdiqləyib. Uolts isə administrasiyada açıq şəkildə tənqid olunur. Siyasətçilər onun məsuliyyətsizlik etdiyini, bunun yüksək səviyyəli səhlənkarlıq olduğunu deyir və onu istefaya çağırırlar.
Politico-nun məlumatına görə:
- Tramp Uoltsdan məyusdur
- Ağ Evdə onun vəzifədən çıxarılması məsələsi aktiv şəkildə müzakirə olunur
- Bəzi rəsmilər onu “nəzarətsiz” və “etibarsız” adlandırırlar
Tramp nə deyir?
Trampa bu məsələ barədə Ağ Evdə keçirilən tədbir zamanı sual verilib. O, heç nədən xəbərdar olmadığını, “The Atlantic” jurnalının isə artıq ciddi mediaya çevrilmədiyini bildirib. Lakin The Wall Street Journal yazır ki, Tramp əslində hadisədən narazıdır və bu barədə artıq Uoltsla söhbət aparıb.
Müdafiə naziri və jurnalist arasında qarşıdurma
ABŞ-ın müdafiə naziri Pit Hegset Signal qrupunda hərbi planların müzakirə edildiyini inkar edib və Qoldberqi “yalançı jurnalist” adlandırıb. Jurnalist isə əksinə, ordunun konkret zərbə planlarını əks etdirən mesajları şəxsən gördüyünü və Hegsetin yalan danışdığını bildirib.
Niyə bu qədər ciddi məsələdir?
Bu insident ABŞ Konqresində də rezonans doğurub:
- Demokratlar şəffaflıq və məsuliyyət tələb edir
- Respublikaçılar isə təhlükəsizlik protokollarının yoxlanılmasını istəyirlər
- Senatın Silahlı Qüvvələr Komitəsi ayrıca istintaqa başlayacaq
Əgər sübut olunsa ki, Signal çatı vasitəsilə doğrudan da məxfi hərbi məlumatlar paylaşılıbsa, Uolts ABŞ-ın casusluq qanunlarının pozulmasında ittiham oluna bilər. Onun gələcək taleyini yaxın günlərdə şəxsən prezident Tramp müəyyən edəcək.
