Yaxın vaxtlarda Bakı metrosunda gediş haqqını elektron pulqabı vasitəsilə ödəmək mümkün olacaq. Bu barədə Rəqəmsal İnkişaf və Nəqliyyat Nazirliyi yanında İctimai Şuranın üzvü Elvin Abbasov məlumat verib.
Onun sözlərinə görə, ictimai nəqliyyatda ödəniş sistemlərinin beynəlxalq platformalarla inteqrasiyası daha rahat və funksional olacaq. Söhbət Google Pay, Apple Pay və digər analoji ödəniş vasitələrindən gedir. Beləliklə, sərnişinlər əlavə tətbiq yükləmədən öz smartfonlarında mövcud olan ödəniş vasitəsilə metro, dəmir yolu və digər ictimai nəqliyyat növlərində rahat şəkildə ödəniş edə biləcəklər.
“Bu sistem o deməkdir ki, vətəndaş əlavə proqram yükləmədən, öz telefonunda istifadə etdiyi ödəniş vasitəsi ilə metroda, dəmir yolunda və ümumiyyətlə Bakının ictimai nəqliyyatında ödəniş edə bilməlidir”, – deyə E.Abbasov vurğulayıb.
Hazırda bu istiqamətdə texniki hazırlıq işləri davam etdirilir və yaxın aylarda sınaq mərhələsinin başlanacağı gözlənilir. Bu yenilik həm yerli sakinlər, həm də şəhərə gələn turistlər üçün gediş sistemini daha çevik və müasir hala gətirəcək.
