5 iyun 2025-ci ildə UEFA Millətlər Liqasının 2024/25 mövsümünün yarımfinalında Ştutqartın MHP Arenasında keçirilən İspaniya–Fransa qarşılaşması futbol tarixində iz buraxdı. İspaniya yığması nəfəskəsici matçda Fransa üzərində 5:4 hesablı qələbə qazanaraq finala yüksəldi. Bu oyun Millətlər Liqası tarixində ən çox qol vurulan qarşılaşma oldu.
Oyunun əsas anları
12’ – Teo Ernandesin zərbəsi dirəyə dəyir
22’ – Uilyams hesabı açır
25’ – Merino Oyarzabaldan ötürmə alaraq fərqlənir
53’ – Yamal penalti qazanır və dəqiq yerinə yetirir
55’ – Pedri texniki zərbə ilə hesabı 4:0 edir
59’ – Mbappe penalti ilə fərqi azaldır
67’ – Yamal dublunu tamamlayır
79’ – Şerki cərimə meydançasından gözəl zərbə ilə qol vurur
84’ – Vivian avtoqol edir
90+3’ – Kolo Muani fərqi minimuma endirir
Matçın icmalı
İki Avropa nəhəngi yüksək tempdə oyuna başladı. Mbappe və Uilyamsın erkən zərbələri, Teo Ernandesin dirəyə dəyən şutu ilk təhlükəli epizodlar idi. 22-ci dəqiqədə Oyarzabalın ötürməsini dəyərləndirən Uilyams hesabı açdı.
Bundan üç dəqiqə sonra yenə Oyarzabalın ustalıqla etdiyi ötürməni Merino qola çevirdi. Qeyd edək ki, Merino 2024-cü ildə də bu stadionda Almaniyaya qarşı qələbə qolunu vurmuşdu.
İkinci hissədə 17 yaşlı Lamin Yamal parladı – əvvəlcə penalti qazandı və onu qola çevirdi, dərhal sonra isə Pedrinin qolu ilə hesab 4:0 oldu.
Fransa Mbappenin penalti qolu ilə fərqi azaltmağa çalışsa da, Yamal 67-ci dəqiqədə yenidən fərqlənərək dubl etdi. Dəyişikliklərə əl atan Didye Deşamın komandası ruhdan düşmədi və son 15 dəqiqədə ardıcıl hücumlarla matça həyacan qatdı.
Şerkinin fantastik qolu, Viviyanın avtoqolu və Kolo Muaninin başla vurduğu son qol Fransa üçün ümid işığı olsa da, vaxt çatmadı.
Matçın oyunçusu: Lamin Yamal (İspaniya)
“Cəmi 17 yaşında olsa da, hücumda göstərdiyi yetkinlik və təhlükə yaratmaq bacarığı onu bu qarşılaşmanın açar fiquruna çevirdi.”
Əsas statistik göstəricilər:
- İspaniya ardıcıl üçüncü dəfə Millətlər Liqasının finalına yüksəldi
- İspaniya son 12 Millətlər Liqası oyununda məğlub olmayıb (8 qələbə, 4 heç-heçə)
- Fransa son 12 oyunun 8-də İspaniyaya uduzub
- Bu qarşılaşma Millətlər Liqası tarixində ən çox qol vurulan oyun oldu
- Fransa 1969-cu ildən bəri ilk dəfə bir oyunda 5 qol buraxdı (sonuncu dəfə İngiltərəyə 0:5 uduzmuşdu)
Start heyətləri:
İspaniya:
Simón; Porro, Le Normand (Vivian 77), Heisen, Cucurella; Merino (Gavi 90+1), Zubimendi, Pedri (Ruiz 64); Yamal, Oyarzabal (Samu 77), Williams (Olmo 64)
Fransa:
Maignan; Kalulu (Gusto 63), Konate, Lenglet (L. Hernandez 72), T. Hernandez; Koné, Rabiot; Dembélé (Kolo Muani 76), Olise (Cherki 63), Doué (Barcola 63); Mbappe
