İllər keçdikcə bağırsaqların vəziyyəti pisləşməyə başlayır. Bu, qida maddələrinin düzgün mənimsənilməməsinə və xroniki iltihab riskinin artmasına səbəb olur. Ancaq gündəlik rejimə əlavə ediləcək bəzi sadə vərdişlər bağırsaqları sağlam saxlamağa kömək edə bilər. Mütəxəssislər – qastroenteroloqlar – 50 yaşını keçmiş insanlara səhər tezdən bir çox asan, lakin çox faydalı hərəkət etməyi məsləhət görür. Bu barədə Parade jurnalı yazır.
Yaşlandıqca bağırsaqlar niyə dəyişir?
Qastroenteroloq Dipa Şah araşdırmalara istinadən izah edir ki, illər ötdükcə bağırsaq mikroflorası dəyişir: faydalı bakteriyaların sayı azalır, zərərlilərin isə artır. Eyni zamanda həzm fermentlərinin ifrazı azalır və xroniki iltihab ehtimalı yüksəlir.
Tibbi tədqiqatlara görə, bu dəyişikliklər özünü belə göstərir: qaz yığılması və şişkinlik tez-tez olur, qəbizlik yaranır, ürəkyanması hiss olunur, kalsium və B12 vitamini kimi vacib maddələr pis mənimsənilir, hətta yuxu keyfiyyəti də pisləşə bilər.
Məhz buna görə mütəxəssislər 50 yaşdan yuxarı şəxslərə səhərə xüsusi bir hərəkətlə başlamağı tövsiyə edir.
“Oyanan kimi əlinə qəhvə fincanı deyil, su şüşəsi götürmək lazımdır”, – vurğulayır doktor Leybelis Padilla.
Bu fikri qastroenteroloq Conatan D. Vaynberq də dəstəkləyir və əlavə edir ki, səhər qəhvəsindən əvvəl bir stəkan su içmək bağırsağa çoxsaylı faydalar verir.
“Gecə boyunca orqanizm susuz qalır, qəhvə isə sidikqovucu təsirə malik olduğundan maye itkisini daha da gücləndirir”, – deyir o. “Əvvəlcə su içməklə maye balansını bərpa etmək həzmi normallaşdırır və susuzluqla bağlı narahatlıqların – qəbizlik, baş ağrısı, yorğunluq kimi problemlərin qarşısını alır”.
Doktor Padilla qeyd edir ki, kifayət qədər su qəbulu həm də qida maddələrinin daha yaxşı sorulmasına, bağırsaq selikli qişasının qorunmasına və bağırsağın vaxtında boşalmasına kömək edir.
Beləliklə, onun sözlərinə görə, şişkinlik və qaz şikayətləri xeyli azalır.
Səhər su içməyin düzgün qaydası
Doktor Şah vurğulayır ki, səhər su qəbulunun vaxtını düzgün seçmək önəmlidir.
“Su içdikdən sonra 30 dəqiqə gözləməyi, yalnız sonra qəhvə içməyi məsləhət görürəm”.
Bu intervalın xüsusilə qəbizlik problemi olan böyüklər üçün faydalı olduğunu bildirir.
“Su təsirini göstərmək üçün lazım olan 30 dəqiqə orqanizm hüceyrələrinin oyanmasına və həzm mexanizminin işə düşməsinə imkan yaradır”, – izah edir doktor Şah. “Bu müddətdən sonra qəhvə içsəniz, mədə qəhvədəki turşudan daha yaxşı qorunur – bufer zonası yaranır”.
Nəticədə gün ərzində mədə narahatlığı və ürəkyanması riski xeyli aşağı düşür.
Bu sadə vərdiş – oyanan kimi bir stəkan su içmək – yaşla bağlı bağırsaq problemlərinin qarşısını almaqda ən effektiv yollarından biridir. Mütəxəssislər vurğulayır ki, bunu gündəlik rejimə çevirmək uzunmüddətli sağlamlıq üçün böyük töhfə ola bilər.
