Bu il oktyabrın 10-da Baş Prokurorluq orqanlarına qulluğa qəbul üçün elan edilmiş müsabiqə çərçivəsində test imtahanı keçirilməsi planlaşdırılır. Məlumatına görə, imtahan saat 10:00-da başlayacaq və 3 saat davam edəcək.
İmtahan Bakı şəhəri, Binəqədi rayonu, S.S.Axundov küçəsi 108 ünvanında yerləşən Dövlət İmtahan Mərkəzinin Elektron imtahanlar korpusunda keçiriləcək. Namizədlər imtahana ən azı 1 saat əvvəl gəlib, “İmtahana buraxılış vərəqəsi” və şəxsiyyət vəsiqəsinin əslini təqdim etməlidirlər.
Dövlət İmtahan Mərkəzi tərəfindən test imtahanının ödənişli olduğu bildirilib. Ödəniş oktyabrın 3-də saat 09:00-dan başlayaraq, 7-də saat 23:59-da sonuncu vaxtadək Dövlət İmtahan Mərkəzinin rəsmi saytı üzərindən həyata keçiriləcək.
İmtahan kompüter vasitəsilə elektron formada aparılacaq və onun sonunda namizədlər ekranda nəticələr barədə məlumat alacaq. Həmçinin məlumat-arayış şəxsi kabinetlərə də yüklənəcək. Namizədlər “Yaddaş kitabçası” və kompüterdən istifadə üçün təlimatla əvvəlcədən tanış olmalıdırlar.
