İnnovasiya və Rəqəmsal İnkişaf Agentliyi (İRİA) ilə “White Hill Capital” vençur fondu arasında Azərbaycanda yeni vençur maliyyələşmə şirkətinin yaradılması üçün Təsis Müqaviləsi imzalanıb. Report-un məlumatına görə, “White Hill Capital” Mərkəzi Avrasiya regionunda vençur kapital investisiyalarında fəal iştirak edir və bir çox startapların inkişafında mühüm rol oynayır.
“INMerge 2025” innovasiya sammiti zamanı əldə edilən razılaşma çərçivəsində fondun Azərbaycandakı fəaliyyəti genişləndiriləcək. İRİA sədri Fərid Osmanov bildirib ki, yeni xarici vençur fondunun Azərbaycana gəlişi yerli startapların qlobal bazara inteqrasiyasını sürətləndirəcək: “Biz startapların vençur maliyyələşməsinə çıxış imkanlarını artırmaq məqsədilə bu addımı atdıq. “White Hill Capital”ın regional təcrübəsi çox yüksəkdir və ümid edirik ki, fondun resurslarından ölkəmizin ekosistemi faydalanacaq.”
“White Hill Capital” vençur fondunun idarəedici ortağı Aslan Sultanov Azərbaycanın startap potensialını yüksək qiymətləndirərək, fondun ölkəmizə gəlişinin investisiya portfelinin zənginləşməsinə və vençur maliyyələşmə bazarının müxtəlifləşməsinə gətirib çıxaracağını vurğulayıb.
Tədbirdə həmçinin fondun dəstəklədiyi Azərbaycan “Push30” və Tacikistanın “Zypl” startapları təqdim olunub. Nümayəndələr fondun maliyyə dəstəyinin startapların inkişafında nə dərəcədə əhəmiyyətli olduğunu açıqlayıblar.
Qeyd edək ki, “White Hill Capital” 2021-ci ildə Qazaxıstanda yaradılmış regional vençur fondudur və əsasən Mərkəzi Avrasiya regionundakı startaplara yatırım edir.
