Rəqəmsal inkişafın sürətləndiyi dövrdə “AzInTelecom” MMC tərəfindən iki yeni data mərkəzin tikintisinə başlanılıb. Bunlar “Hökumət buludu” (G-cloud) xidmətinin yerləşdiriləcəyi əsas obyektlərdən olacaq.
Məlumata görə, agentlik tərəfindən Abşeron və Hacıqabul rayonlarında yerləşən data mərkəzlərin yaradılması planlaşdırılır. Abşeronda inşa edilən mərkəzin qarşıdakı iki il ərzində, yəni 2027-ci ildə, Hacıqabuldakı ikinci mərkəzin isə 2029-cu ildə istifadəyə veriləcəyi gözlənilir. Bu obyektlər regionun ən böyük data mərkəzləri kimi fəaliyyət göstərəcək və eyni zamanda Milli Data Mərkəz statusunu daşıyacaq.
Yeni data mərkəzlərin işə başlaması ilə “Hökumət buludu”nun hazırda fəaliyyət göstərdiyi infrastrukturdan bu böyük və müasir obyektlərə köçürülməsi nəzərdə tutulur. Bu addım rəqəmsallaşmanın daha da sürətlənməsinə, dövlət məlumatlarının təhlükəsizliyinin və idarə olunmasının optimallaşdırılmasına şərait yaradacaq.
Layihənin həyata keçirilməsi ilə həm də informasiya texnologiyaları sahəsində regionda rəqabətqabiliyyətli infrastrukturun yaradılması təmin ediləcək və bununla Azərbaycanın digital transformasiyadakı mövqeyi güclənəcək.
