Paytaxt Bakı şəhərində sənaye və incəsənətin harmoniyası yeni bir yaradıcılıq platforması yaratdı. Daş Salnamə Muzeyinin önündə təşkil olunan “Baku Steel Art 2025” sərgisi sənətsevərlərin diqqətini cəlb edib.
Bu tədbir Fly to Baku. Art Weekend. Sense the Future NOW adlı incəsənət həftəsonu proqramı çərçivəsində, “Baku Steel Company” QSC və “QGallery” şirkətinin birgə səyi ilə reallaşıb. Sərgidə 2024 və 2025-ci illərdə keçirilən “Baku Steel Art” beynəlxalq metal simpoziumlarının iştirakçılarının yaratdıqları 27 fərqli əsər nümayiş olunur.
Burada polad artıq sadə material olmaqdan çıxıb, yaddaş, təbiət və texnoloji inkişafın simvolu kimi rəssamların əsərlərinə yeni məna verir. Hər əsər poladın sərtliyi ilə sənətkarın dəyanəti arasında qurulmuş dialoqdur. Poladın möhkəmliyi və elastikliyi həmfəlsəfi dərinlik, həm də gözəllik və davamlılığın simvoludur. BSC-nin maliyyə vəsaiti sayəsində yüksək keyfiyyətli materialdan istifadə edilərək sənət əsərləri tam potensialı ilə üzə çıxarılıb.
Sərginin açılışında “Art Weekend”in təşəbbüskarı və Heydər Əliyev Fondunun vitse-prezidenti Leyla Əliyeva, Bakı Media Mərkəzinin rəhbəri Arzu Əliyeva, Alena Əliyeva və festival iştirakçıları, həmçinin qonaqlar iştirak edib.
Bakı şəhərinin tarixi mənzərəsi ilə polad əsərlərin poetik enerji qatdığı sərgi ziyarətçiləri təsirləndirir, duyğulara toxunur və ilham verir. “Baku Steel Art 2025” sərgisi 30 noyabr 2025-ci ilədək ictimaiyyət üçün açıq olacaq və paytaxt sakinlərinə, eləcə də turistlərə sənaye gücünün incəsənətlə necə vəhdət təşkil etdiyini nümayiş etdirəcək.
