Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinin (AYNA) məlumatına əsasən, noyabrın 12-dən etibarən Bakı və Sumqayıt şəhərlərini birləşdirən 500 nömrəli yeni müntəzəm avtobus marşrutu istifadəyə veriləcək.
Yeni xəttin yaradılmasında məqsəd Sumqayıtdan Bakıya olan böyük sərnişin axınının rahat və sürətli daşınmasını təmin etməkdir. Marşrut metronun “20 Yanvar” stansiyası istiqamətində fasiləsiz qatar keçirilməsi üçün önəmlidir.
Avtobuslar marşruta Sumqayıt şəhərində Zülfü Hacıyev küçəsindən (Heydər Əliyev parkı) başlayacaq, Nəriman Nərimanov küçəsi, Sülh prospekti və Ceyranbatan qəsəbəsi istiqamətindən hərəkət edərək son dayanacaq olaraq Bakının Seyid Cəfər Pişəvari küçəsində dayanacaq.
Xətt üzrə 20 ekoloji təmiz, CNG yanacağı ilə işləyən böyük tutumlu avtobus sərnişinlərə xidmət göstərəcək. Avtobusların hərəkət müddəti saat 05:45-dən 23:00-a qədər davam edəcək, yollarda interval isə təxminən 7-8 dəqiqə təşkil edəcək.
Marşrutda gediş haqqı 0,80 manat olaraq müəyyənləşdirilib və nağdsız ödəniş sistemi tətbiq olunacaq.
