Gələn il Azərbaycanda dövlət büdcəsindən dini sahənin inkişafı üçün xeyli vəsait ayrılması nəzərdə tutulur. Maliyyə nazirinin müavini Himalay Məmişovun Milli Məclisin Gənclər və idman, İctimai birliklər və dini qurumlar, Mədəniyyət komitələrinin birgə iclasında verdiyi məlumata görə, 2026-cı ildə İlahiyyət İnstitutuna 3,9 milyon manat, İlahiyyət Kollecinə isə 0,9 milyon manat vəsait yönəldiləcək.
Bundan əlavə, Dini Qurumlarla İş üzrə Dövlət Komitəsinin tabeliyində fəaliyyət göstərən Mənəvi Dəyərlərin Təbliği Fonduna 14 milyon manat ayrılması planlaşdırılır.
Himalay Məmişov bildirib ki, dövlət dini sahəyə diqqətlə yanaşır və bu istiqamətdə bütün proqramlarda maliyyə artımı nəzərdə tutulub. Xüsusilə dini kadrların hazırlanması və dini dəyərlərin yayılması üçün ciddi maliyyə dəstəyi göstəriləcək.
