İqtisadi Əməkdaşlıq Təşkilatının “Dialoqun, əməkdaşlığın və regional həmrəyliyin təşviq edilməsi” mövzusunda D-8 Media Forumu Bakıda işə başlayıb. Tədbir Medianın İnkişafı Agentliyi (MEDİA) tərəfindən təşkil olunub və 8 üzv ölkə ilə birlikdə təşkilatın Katibliyindən 71 xarici nümayəndə də daxil olmaqla 150-yə yaxın qonağı bir araya gətirib.
Forum çərçivəsində media sahəsində əməkdaşlığın gücləndirilməsi, regional və beynəlxalq səviyyədə informasiya mübadiləsinin təkmilləşdirilməsi, dezinformasiyaya qarşı birgə tədbirlərin yaradılması, rəqəmsal media sahəsində layihələrin təşviqi və təcrübə paylaşımı kimi vacib məsələlər müzakirə olunur.
Tədbir zamanı “Məsuliyyətli jurnalistika və rəqəmsal innovasiya” və “Strateji kommunikasiya və böhranın idarə olunması” mövzularında panel sessiyalar, həmçinin “Rəqəmsallaşan dünyada media etikası: Texnologiyalar, trendlər və narrativlər” mövzusunda praktiki təlimlər təşkil ediləcək.
Bu forum, D-8 üzv ölkələrinin media sahəsində əlaqələrinin daha da möhkəmlənməsi və informasiya cəmiyyəti üçün yeni perspektivlərin açılması baxımından mühüm əhəmiyyət kəsb edir.
