Səudiyyə Ərəbistanının Ər-Riyad şəhərində keçirilən VI İslam Həmrəyliyi Oyunlarında Azərbaycan millisinin idmançıları yarışın başa çatdığı gün son medallar uğrunda güclü rəqabətə qoşulublar. Bu gün təmsilçilərimiz üç idman növündə fəxri kürsü uğrunda sınaq verəcək.
Ciu-citsu döyüş növündə Əmirxan Quluzadə (77 kq) və Maqsudxan Quluzadə (62 kq) tatami üzərinə çıxaraq final üçün güclərini sınayacaqlar. Parapauerliftinq yarışında isə Zəhra Dadaşova (61 kq) və Ceyhun Mahmudov (59 kq) medallar uğrunda rəqibləri ilə mübarizə aparacaq. Sərbəst güləşdə millimizin dörd idmançısı – Ağanəzər Novruzov (74 kq), Arseniy Djioyev (86 kq), Maqomedxan Maqomedov (97 kq) və Giorgi Meşvildişvili (125 kq) xalçaya çıxaraq yarışın qızğın mənzərəsinə qatılacaq.
Builki İslamiadanın bağlanış gününə Azərbaycan 8 qızıl, 18 gümüş və 29 bürünc olmaqla ümumilikdə 55 medalla medal cədvəlində 10-cu sırada daxil olub. Yarışın son saatlarında ölkəmizin idmançıları fəxri kürsüdə yer tutmaq üçün əllərindən gələni əsirgəmirlər.
