Doqquzuncu sinfi yeni model üzrə bitirən şagirdlər gələcəkdə XI sinif buraxılış imtahanını da eyni formatda verəcəklər. Bu barədə Dövlət İmtahan Mərkəzinin (DİM) İdarə Heyətinin sədri Məleykə Abbaszadə açıqlama verib.
Onun sözlərinə görə, hər il qəbul proqramının formalaşdırılması zamanı kurikulumun tətbiq ediləcək meyarları Elm və Təhsil Nazirliyi ilə birgə müzakirə olunur. “Buraxılış imtahanlarının nəticələrini daim təhlil edirik və növbəti ilin qəbul proqramı həmin nəticələrə əsasən hazırlanır. Qəbul proqramı isə əvvəlcədən elan edilir”, – deyə o bildirib.
Qəbul proqramı məktəb proqramına əsaslanır
DİM rəhbəri vurğulayıb ki, ali məktəblərə qəbul proqramı orta məktəbdə tədris olunan mövzulara uyğun tərtib olunur.
Mövzuların sayı azaldıla bilər, lakin artırılması mümkün deyil. O qeyd edib ki, qəbul proqramında indiyədək yalnız bir dəfə dəyişiklik edilib. Bu dəyişiklik 2020-ci ildə Vətən müharibəsində əldə olunan Qələbə ilə bağlı olub və həmin hadisələr tarix fənninə əlavə edilib.
Məleykə Abbaszadə bildirib ki, dərsliklərin yenilənməsi və kurikulumun təkmilləşdirilməsi davamlı prosesdir. “İmtahana daxil ediləcək mövzular Elm və Təhsil Nazirliyi ilə birgə qərar əsasında müəyyənləşdirilir”, – deyə o əlavə edib.
İngilis dili üzrə yeni model davam etdiriləcək
DİM sədri ingilis dili üzrə buraxılış imtahanında tətbiq olunan yeniliklərə də toxunub. Onun sözlərinə görə, bir il əvvəl IX siniflər üçün yeni imtahan modeli tətbiq edilib və həmin şagirdlər XI sinifdə də buraxılış imtahanını eyni formatda verəcəklər.
Hazırda bu şagirdlər X sinifdə təhsil alır və 2027-ci ildə keçiriləcək imtahana, o cümlədən esse yazı modelinə uyğun şəkildə hazırlaşırlar. Beləliklə, imtahan formatında ardıcıllıq təmin edilir və şagirdlərin hazırlıq prosesi əvvəlcədən müəyyən edilmiş proqram əsasında davam etdirilir.
