Bakı və Sumqayıt şəhərlərində, eləcə də Qax rayonunda yaşıllıqların qanunsuz məhv edilməsi faktları qeydə alınıb.
Dövlət Ekoloji Təhlükəsizlik Xidmətinin məlumatına görə, son bir həftə ərzində keçirilən nəzarət tədbirləri zamanı müxtəlif ünvanlarda ağac və kolların icazəsiz kəsildiyi müəyyən edilib. Xidmət əməkdaşlarının apardığı araşdırmalar nəticəsində paytaxtın bir neçə rayonunda ciddi pozuntular üzə çıxıb.
Aşkarlanan ünvanlar və kəsilən yaşıllıqlar
Yoxlamalar zamanı aşağıdakı ərazilərdə qanunsuz kəsim faktları qeydə alınıb:
- Xətai rayonu, Kazımağa Kərimov küçəsi 18 – 1 ağac
- Yasamal rayonu, Şərifzadə küçəsi 134 – 2 ağac
- Binəqədi rayonu, Biləcəri qəsəbəsi, Sumqayıt şosesi 10A – 30 ağac
- Binəqədi rayonu, Biləcəri qəsəbəsi 53E – 42 ağac
- Qaradağ rayonu, Bakı–Ələt yolunun 50-ci km-i – 13 ağac, 12 kol
- Sumqayıt şəhəri, 21-ci məhəllə – 6 ağac, 4 kol
- Sumqayıt dənizkənarı bulvar ərazisi – 17 ağac
- Sumqayıt, Heydər Əliyev prospekti ilə 20 Yanvar küçəsinin kəsişməsi – 21 ağac
- Qax rayonu, Zərnə kəndi – 9 ağac
Məlumata əsasən, hər bir fakt üzrə təbiətə vurulan ziyanın məbləği cinayət tərkibi yaratdığından toplanmış materiallar hüquqi qiymət verilməsi üçün hüquq-mühafizə orqanlarına təqdim edilib.
Dövlət Ekoloji Təhlükəsizlik Xidməti vətəndaşları yaşıllıqlara qarşı qanunsuz müdaxilə hallarına biganə qalmamağa və bu cür hallarla bağlı aidiyyəti qurumlara məlumat verməyə çağırır.
