Hollivud aktyoru George Clooney ABŞ prezidenti Donald Trumpın İranla bağlı səsləndirdiyi qalmaqallı fikirlərə açıq şəkildə etiraz edib. O, Trampın “bu gecə bütöv bir sivilizasiya məhv ola bilər” məzmunlu bəyanatını beynəlxalq hüquq baxımından qəbuledilməz adlandırıb.
Kluni bu fikirləri İtaliyanın Kuneo şəhərində minlərlə məktəbli ilə keçirilən görüş zamanı səsləndirib. Tədbir onun rəhbərlik etdiyi Clooney Foundation for Justice tərəfindən təşkil olunub. Aktyor bildirib ki, belə ifadələr siyasi polemikanın sərhədlərini aşır və ciddi nəticələr doğura bilər: “İstənilən baxışdan asılı olmayaraq, keçilməməli olan bir etik xətt var.”
Ağ Evdən sərt cavab gəldi
Kluninin çıxışından sonra Ağ Evin kommunikasiya direktoru Steven Cheung aktyoru kəskin tənqid edib. O, ironik şəkildə bildirib ki, “yeganə cinayət törədən şəxs Kluninin özüdür – uğursuz filmləri və aktyorluğu ilə”.
Buna cavab olaraq Kluni mediaya açıqlamasında emosional polemikadan uzaq durmağa çağırıb. O qeyd edib: “Ailələr yaxınlarını itirir, uşaqlar müharibənin qurbanına çevrilir, dünya iqtisadiyyatı təzyiq altındadır. Belə şəraitdə şəxsi hücumlar yox, ciddi və məzmunlu müzakirələr lazımdır.”
Aktyor həmçinin vurğulayıb ki, bir xalqın məhv edilməsinə yönəlmiş niyyət beynəlxalq hüquqda hərbi cinayət sayılır və bu, müvafiq konvensiyalarla təsbit olunub.
Uzunmüddətli qarşıdurma
Kluni ilə Tramp arasındakı fikir ayrılığı yeni deyil. Aktyor daha əvvəl də siyasi mövqeyi ilə diqqət çəkmiş, ABŞ-da seçkilər öncəsi açıqlamaları ilə geniş müzakirələrə səbəb olmuşdu. Tramp isə onu dəfələrlə tənqid edərək “saxta aktyor” və “ikinci dərəcəli ulduz” adlandırmışdı.
Bununla belə, Kluni keçmişdə münasibətlərin fərqli olduğunu etiraf edib. Onun sözlərinə görə, Tramp prezident olmamışdan əvvəl aralarında normal ünsiyyət olub: “Onu yaxşı tanıyırdım. Görüşürdük, danışırdıq. Amma sonradan hər şey dəyişdi.”
Ekspertlər də qeyd edir ki, mülki infrastruktura və ya əhaliyə qarşı belə ritorika hüquqi risklər yarada bilər və beynəlxalq normalara zidd hesab olunur.
