Hər il mayın 15-i dünyada Beynəlxalq Ailə Günü kimi qeyd olunur. Bu əlamətdar tarix ailə institutunun cəmiyyətdəki rolunu vurğulamaq və mövcud problemlərə diqqət çəkmək məqsədi daşıyır.
Bu günün təsis edilməsi ilə bağlı qərar 1993-cü ildə BMT Baş Assambleyası tərəfindən qəbul edilib. Rəsmi olaraq isə 1994-cü ildən etibarən qeyd olunmağa başlanılıb. Məqsəd ailələrin qarşılaşdığı sosial, iqtisadi və demoqrafik çağırışları gündəmdə saxlamaq və bu istiqamətdə qlobal diqqəti artırmaqdır.
Azərbaycanda ailə siyasəti və milli dəyərlər
Azərbaycanda ailə institutunun formalaşması və inkişafı dövlət siyasətinin əsas istiqamətlərindən biri kimi qiymətləndirilir. Bu sahədə əsas prinsiplərin müəyyənləşdirilməsi ümummilli lider Heydər Əliyevin adı ilə bağlıdır. O, çıxışlarında milli-mənəvi dəyərlərin qorunmasının vacibliyini xüsusi vurğulayaraq belə demişdi:
“Azərbaycan xalqının ənənələrindən biri də budur ki, uşaqlara qayğı göstərmək hər bir ailənin əsas mənəvi borcudur”.
Bu siyasət bu gün də davam etdirilir. Prezident İlham Əliyev ailə dəyərlərinin ölkənin inkişafında mühüm rol oynadığını dəfələrlə qeyd edib:
“Ölkəmizin gələcək inkişafı və milli dəyərlərin qorunması üçün ailə institutu güclü olmalıdır”.
Birinci vitse-prezident Mehriban Əliyevanın rəhbərlik etdiyi layihələr də ailə, qadın və uşaq problemlərinin həllinə, milli dəyərlərin qorunmasına yönəlib.
Ailə institutunun inkişafına yönələn tədbirlər
Hazırda Azərbaycanda ailələrin sosial rifahının yaxşılaşdırılması istiqamətində müxtəlif proqramlar həyata keçirilir. Dövlət siyasəti çərçivəsində:
- ailələrin sosial müdafiəsi gücləndirilir
- gənclərin ailə dəyərləri əsasında tərbiyəsi təşviq olunur
- sağlam həyat tərzi və ailədaxili münasibətlər təbliğ edilir
Bununla yanaşı, Ailə, Qadın və Uşaq Problemləri üzrə Dövlət Komitəsi tərəfindən hər il müxtəlif bölgələrdə tədbirlər təşkil olunur. Bu təşəbbüslər ailə institutunun möhkəmləndirilməsinə və gələcək nəsillərə sağlam dəyərlərin ötürülməsinə xidmət edir.
