İnternetdə uzun illərdir əsas yükü istifadəçilərin yaratdığı trafik daşısa da, son statistik göstəricilər bu mənzərənin dəyişdiyini ortaya qoyur. Bulud əsaslı təhlükəsizlik və hostinq xidmətləri təqdim edən Cloudflare-in açıqladığı məlumatlara görə, şirkətin infrastrukturundan istifadə edən bəzi veb-saytlarda artıq sorğuların böyük hissəsi insanlar deyil, avtomatlaşdırılmış sistemlər tərəfindən göndərilir.
Məlumata əsasən, ümumi trafikin 57,4 faizi botların və süni intellekt əsaslı agentlərin payına düşür. İnsan mənşəli trafik isə 42,6 faiz səviyyəsinə enib. Beləliklə, internet tarixində ilk dəfə avtomatik sistemlərin fəaliyyəti insan istifadəçilərinin yaratdığı trafiki üstələyib.
Süni intellekt internet davranışını dəyişir
Cloudflare-in həmtəsisçisi və baş icraçı direktoru Metyu Prins bildirib ki, bu dönüş nöqtəsinin daha gec baş verəcəyini gözləyirdi. Lakin son illərdə süni intellekt texnologiyalarının sürətli inkişafı prosesi gözləniləndən daha tez reallaşdırıb.
Şirkətin qiymətləndirməsinə görə, adi istifadəçi hər hansı məhsul və ya xidmət barədə qərar verməzdən əvvəl orta hesabla bir neçə saytı ziyarət edir. Süni intellekt sistemləri isə eyni müddət ərzində minlərlə səhifəni analiz edə, məlumat toplaya və nəticə çıxara bilir. Bu da bot trafikinin sürətlə artmasına səbəb olur.
Yeni dövr internet iqtisadiyyatını dəyişə bilər
Mütəxəssislər hesab edirlər ki, avtomatlaşdırılmış trafik axınının artması internetin mövcud biznes modelinə də təsir göstərəcək. Xüsusilə məzmun istehsalçıları və sayt sahibləri gələcəkdə süni intellekt sistemlərinin məlumatlardan istifadəsinə görə ödəniş tələb edə bilərlər.
Bu tendensiya son illərdə müzakirə olunan “ölü internet nəzəriyyəsi”ni yenidən gündəmə gətirsə də, Metyu Prins fərqli mövqedən çıxış edir. Onun fikrincə, süni intellekt insan fəaliyyətini əvəz etməkdən daha çox, yeni məzmun yaradanların sayını artırır və daha çox istifadəçinin rəqəmsal istehsal prosesinə qoşulmasına şərait yaradır.
