Son illərdə Azərbaycanda boşanmaların sayında artım müşahidə olunur və mütəxəssislər bunu bir sıra sosial və psixoloji faktorlarla əlaqələndirirlər. Sosioloqlar hesab edir ki, ailədaxili münasibətlərdə yaranan gərginliklər artıq cəmiyyətin ən ciddi problemlərindən birinə çevrilib.
Sosioloq Ağasəlim Həsənovun sözlərinə görə, ailə cəmiyyətin əsas sosial institutlarından biridir və burada baş verən problemlər birbaşa sosial mühitə təsir göstərir. O qeyd edib ki, nikah və boşanma statistikasında son illər mənfi dinamika müşahidə olunur.
Ailədaxili münaqişələr artır
Ekspert bildirib ki, boşanmaların əsas səbəbləri sırasında sosial-iqtisadi çətinliklər, psixoloji gərginlik, gəlir bölgüsü və fərdi azadlıqlarla bağlı problemlər xüsusi yer tutur.
Onun fikrincə, ailəyə kənar müdaxilələr də münasibətlərə ciddi təsir edir. Bundan başqa, bəzi hallarda alkoqolizm, narkomaniya və digər zərərli vərdişlər ailədaxili konfliktləri daha da dərinləşdirir.
Ağasəlim Həsənov qeyd edib ki, zorakılıq halları da boşanmaların artmasında mühüm rol oynayır:
“Bəzi ailələrdə qadınlara və uşaqlara qarşı fiziki və psixoloji təzyiqlərlə qarşılaşırıq. Bu cür hallarda ailə münasibətlərinin davam etməsi daha ağır nəticələrə səbəb ola bilər”.
“Sivil boşanma bəzən daha doğru seçimdir”
Sosioloq hesab edir ki, uzunmüddətli konflikt şəraitində yaşayan ailələrdə yaranan psixoloji gərginlik xüsusilə uşaqlara mənfi təsir göstərir. Onun sözlərinə görə, bəzi hallarda davamlı münaqişə boşanmadan daha təhlükəli nəticələr doğura bilir.
Ekspert vurğulayıb ki, məqsəd boşanmanı təşviq etmək deyil, ailədaxili sağlam münasibətlərin qorunmasıdır. O əlavə edib ki, ailədə baş verən mənəvi deqradasiya gələcəkdə cəmiyyət üçün ciddi sosial problemlər yarada bilər.
Rəsmi statistikaya əsasən, 2025-ci ildə Azərbaycanda 48 min 546 nikah, 20 min 675 boşanma qeydə alınıb.
