Bolqarıstan Azərbaycanla enerji əməkdaşlığının genişləndirilməsində maraqlı olduğunu bir daha bəyan edib. Bolqarıstan Respublikasının vitse-prezidenti İliyana Yotovanın sözlərinə görə, Sofiya Yunanıstan-Bolqarıstan interkonnektoru vasitəsilə Avropaya nəql olunan Azərbaycan qazının həcmini artırmağı planlaşdırır.
O bildirib ki, Prezident İlham Əliyevlə aparılan müzakirələrdə əsas diqqət enerji təhlükəsizliyi və regional əməkdaşlıq məsələlərinə yönəlib. Yotova vurğulayıb ki, Bolqarıstan təkcə Azərbaycan qazının alıcısı deyil, eyni zamanda Avropa bazarına çıxış üçün mühüm tranzit ölkə rolunu oynayır.
“Həmrəylik Halqası” layihəsinə böyük ümid var
İliyana Yotova qeyd edib ki, Bolqarıstan Prezidenti Rumen Radevin təşəbbüsü ilə irəli sürülən “Həmrəylik Halqası” layihəsi böyük perspektiv vəd edir. Layihə çərçivəsində Bolqarıstan, Rumıniya, Macarıstan, Slovakiya və Azərbaycanın qazötürmə sistemləri operatorları arasında əməkdaşlıq mexanizmi formalaşdırılır.
Onun sözlərinə görə, tərəflər arasında Anlaşma Memorandumunun imzalanması gələcəkdə Azərbaycan qazının Avropa İttifaqına ixrac həcmini iki dəfə artırmaq potensialına malikdir.
Son illərdə Avropanın enerji təhlükəsizliyində Azərbaycanın rolu daha da güclənib. Xüsusilə Cənub Qaz Dəhlizi və interkonnektor layihələri Avropa ölkələrinin alternativ enerji mənbələrinə çıxışını genişləndirib.
Yaşıl enerji layihələri də gündəmdədir
Bolqarıstan və Azərbaycan yalnız qaz sahəsində deyil, bərpaolunan enerji istiqamətində də əməkdaşlığı genişləndirir. Yotova bildirib ki, hazırda iki böyük “yaşıl enerji” layihəsi üzərində fəal iş aparılır.
Bunlardan biri Xəzər-Qara dəniz-Avropa Yaşıl Enerji Dəhlizi, digəri isə Azərbaycan-Gürcüstan-Türkiyə-Bolqarıstan marşrutu üzrə quru yaşıl enerji dəhlizidir. Bu təşəbbüslərin Avropanın enerji diversifikasiyası baxımından strateji əhəmiyyət daşıdığı vurğulanır.
