Bu gün Azərbaycanda müsəlman aləminin ən müqəddəs bayramlarından biri hesab olunan Qurban bayramı qeyd edilir. İslam təqviminə əsasən, bayram hər il zilhiccə ayının 10-cu gününə təsadüf edir. Bu il həmin tarix miladi təqvimlə 27 maya uyğun gəlib.
Səhər saatlarından etibarən ölkənin müxtəlif məscidlərində bayram namazları qılınır. Bakıda yerləşən Əjdərbəy məscidində bayram namazı saat 08:00-da, Təzəpir məscidində isə saat 09:00-da təşkil olunub. Paytaxtla yanaşı, regionlarda da yüzlərlə insan bayram ibadətində iştirak edir.
Qurban kəsimi xüsusi məntəqələrdə aparılır
Bayram münasibətilə qurban kəsimi bu gün və sabah həyata keçiriləcək. Proses Azərbaycan Qida Təhlükəsizliyi Agentliyinin müəyyən etdiyi xüsusi məntəqələrdə təşkil olunur. Qurbanların kəsimi dini qaydalara uyğun şəkildə, Qafqaz Müsəlmanları İdarəsinin nümayəndələrinin nəzarəti altında həyata keçirilir.
Mütəxəssislər və din xadimləri vətəndaşlara qurbanlıq heyvanların yalnız rəsmi satış və kəsim məntəqələrindən alınmasını tövsiyə edir. Bunun həm sanitariya təhlükəsizliyi, həm də dini qaydalara uyğunluq baxımından vacib olduğu bildirilir.
Qurban bayramı Azərbaycanda rəsmi tətil sayılır
Azərbaycanda Qurban bayramı dövlət səviyyəsində qeyd olunur. Ölkə müstəqilliyini bərpa etdikdən sonra qəbul edilən “Azərbaycan Respublikasının bayramları haqqında” qanuna əsasən, Qurban bayramı rəsmi bayram statusu alıb.
Nazirlər Kabinetinin qərarına uyğun olaraq, bu il 27 və 28 may tarixləri ölkədə qeyri-iş günü elan edilib. Bayram günlərində ailə ziyarətləri, ehtiyacı olan insanlara yardım və xeyriyyə aksiyaları da geniş şəkildə keçirilir.
Qurban bayramı müsəlman dünyasında həmrəylik, paylaşmaq və yardımlaşma rəmzi hesab olunur.
