2026-cı il dünya çempionatı yalnız komandalar arasındakı rəqabətlə deyil, eyni zamanda fərqli nəsilləri təmsil edən futbolçuların bir araya gəlməsi ilə də diqqət çəkir. ABŞ, Kanada və Meksikanın birgə ev sahibliyi edəcəyi mundialın iştirakçı heyətləri müəyyənləşdikcə turnirin ən təcrübəli və ən gənc oyunçuları da bəlli olub.
FIFA-nın açıqladığı məlumatlara əsasən, dünya futbolunun tanınmış veteranları ilə yeni nəslin parlaq istedadları eyni səhnədə mübarizə aparacaqlar.
DÇ-2026-nın ən təcrübəli futbolçuları
Portuqaliya millisinin hücumçusu Kriştianu Ronaldo turnirin ən yaşlı iştirakçıları sırasında yer alır. Mundialın startı zamanı onun 41 yaş 126 günlük olacağı gözlənilir. Ronaldo meydana çıxacağı halda, dünya çempionatı tarixində oyun keçirmiş ən yaşlı futbolçular siyahısında dördüncü pilləyə yüksələcək.
Turnirin ən yaşlı oyunçuları bunlardır:
- Kriştianu Ronaldo (Portuqaliya) – 41 yaş 126 gün
- Gilyermo Oçoa (Meksika) – 40 yaş
- Luka Modriç (Xorvatiya) – 40 yaş
- Edin Ceko (Bosniya və Herseqovina) – 40 yaş
- Manuel Noyer (Almaniya) – 40 yaş
- Vozinya (Kabo-Verde) – 39 yaş
Tarixi reytinqdə isə Ronaldonu yalnız misirli Essam El-Hadari, kolumbiyalı Farid Mondragon və kamerunlu əfsanə Rojer Milla qabaqlayır.
DÇ-2026-nın ən gənc futbolçuları
DÇ-2026-nın ən gənc futbolçusu Meksika millisinin üzvü Hilberto Mora olacaq. Cəmi 17 yaşı olan yarımmüdafiəçi mundialda forma geyinəcəyi təqdirdə KONKAKAF zonası tarixində dünya çempionatında çıxış edən ən gənc futbolçu rekorduna sahib çıxa bilər.
Mundialın ən gənc iştirakçıları siyahısında aşağıdakı oyunçular yer alır:
- Hilberto Mora (Meksika) – 17 yaş
- Huqo Sotsurek (Çexiya) – 18 yaş 4 gün
- Lennart Karl (Almaniya) – 18 yaş 109 gün
- İbrahim Mbaye (Seneqal) – 18 yaş 138 gün
- Həmzə Əbdülkərim (Misir) – 18 yaş 161 gün
Mora Meksikanın Cənubi Afrika ilə keçirəcəyi ilk oyunda meydana çıxarsa, dünya çempionatı tarixinin ən gənc altı iştirakçısından biri olacaq. Hazırda bu siyahıda Pele, Salomon Olembe, Samuel Eto’o, Femi Opabunmi və Norman Uaytsayd kimi məşhur futbolçular yer alırlar.
Qeyd edək ki, 11 iyun – 19 iyul tarixlərində keçiriləcək DÇ-2026 tarixdə ilk dəfə 48 komandanın iştirakı ilə baş tutacaq və bu baxımdan mundial yeni rekordlarla yadda qalacaq.
