Əfsanəvi rejissor Corc Miller “Çılğın Maks” franşizasının gələcəyi ilə bağlı yeni planlarını müzakirə etmək üçün bir neçə böyük Hollivud studiyası ilə danışıqlar aparıb. Məlumata görə, məşhur kino ustası postapokaliptik kainat üzrə daha iki layihə hazırlayır.
Söhbət həm franşizanın yekun filmi, həm də ayrıca serial layihəsindən gedir. Bildirilir ki, Miller bu layihələri reallaşdırdıqdan sonra franşizanın hüquqları ilə bağlı yeni qərar verməyi nəzərdən keçirir. Rejissor daha əvvəl son film üçün ssenarinin artıq hazır olduğunu açıqlasa da, layihənin hazırda onun əsas prioritetləri sırasında olmadığını vurğulamışdı.
Warner Bros layihəyə maraq göstərmir
“Çılğın Maks” seriyasının əvvəlki filmlərini istehsal edən Warner Bros studiyası yeni layihələrə qoşulmaq niyyətində deyil. Bunun əsas səbəbi kimi 2024-cü ildə nümayiş olunan “Furiosa” filminin gözlənilən kommersiya uğurunu qazana bilməməsi göstərilir.
Anya Teylor-Coyun baş rolda çəkildiyi ekran əsəri dünya prokatında təxminən 175 milyon dollar gəlir əldə etsə də, böyük istehsal və marketinq xərclərini tam ödəyə bilməmişdi. Bu səbəbdən studiya franşizanın davamına ehtiyatla yanaşır.
Yeni studiyalar maraq göstərir
Bununla belə, Corc Millerin ideyalarına maraq azalmayıb. Məlumata görə, Amazon, Universal və Sony Pictures həm film, həm də serial layihəsi ilə bağlı danışıqları davam etdirməyə hazırdır.
“Çılğın Maks” seriyası uzun illərdir aksiyon və fantastika janrının ən nüfuzlu franşizalarından biri hesab olunur. Buna görə də yeni layihələrin hansı studiyanın himayəsində hazırlanacağı kino dünyasında böyük maraq doğurur.
