2026-cı il dünya çempionatı yalnız meydandakı mübarizə ilə deyil, həm də yüksək qiymətlərlə gündəmə gəlib. ABŞ, Kanada və Meksikanın birgə ev sahibliyi etdiyi mundialı yerində izləmək istəyən azarkeşlər biletlərdən tutmuş hotellərə, nəqliyyata və stadion daxilindəki qida məhsullarına qədər demək olar ki, bütün xidmətlər üçün əvvəlki mundiallarla müqayisədə daha çox vəsait xərcləməli olurlar.
Tarixin ən böyük dünya çempionatında 48 komanda 104 oyunda mübarizə aparır. Turnirə 5 milyondan çox azarkeşin qatılacağı gözlənilir. FIFA isə genişləndirilmiş format hesabına təxminən 11 milyard dollar gəlir əldə etməyi planlaşdırır.
Bilet qiymətlərində ciddi artım müşahidə olunur
Azarkeşlərin ən çox narazı qaldığı məsələ matç biletlərinin qiymətidir. TicketData.com tərəfindən aparılan təhlilə əsasən, iyunun 9-na olan vəziyyətdə qrup mərhələsi oyunları üçün təkrar satış bazarında ən ucuz biletin orta qiyməti 636 dollar təşkil edib.
Bu göstərici 2022-ci ildə Qətərdə keçirilən dünya çempionatının qrup mərhələsində ən yüksək kateqoriyalı biletlərin qiymətindən təxminən üç dəfə çoxdur. FIFA-nın tətbiq etdiyi dinamik qiymət sistemi səbəbindən tələb yüksəldikcə biletlərin qiyməti də mərhələli şəkildə artır.
Müstəqil araşdırmaya istinad edən “The Athletic” nəşri bildirir ki, 2025-ci ilin oktyabr ayından 2026-cı ilin aprelinə qədər rəsmi bilet qiymətlərində orta hesabla 34 faizlik artım qeydə alınıb. Bəzi premium biletlərin qiyməti isə 6730 dollardan təxminən 11 min dollara qədər yüksəlib.
FIFA qiymət siyasətini müdafiə edir
FIFA prezidenti Canni İnfantino bilet qiymətləri ilə bağlı tənqidlərə cavab verərək bildirib ki, dünya çempionatına maraq misli görünməmiş səviyyədədir. Onun sözlərinə görə, artıq 6 milyondan çox bilet satılıb və əlavə olaraq qiyməti 60 dollardan başlayan 130 min bilet də azarkeşlər üçün satışa çıxarılıb.
İnfantino hesab edir ki, rəsmi qiymətlər daha aşağı müəyyənləşdirilsəydi, biletlər ikinci bazarda daha baha qiymətlərə satılacaqdı. FIFA rəhbəri həmçinin vurğulayıb ki, mundialdan əldə olunan gəlirlər yenidən futbolun inkişafına yönəldilir və müxtəlif layihələrin maliyyələşdirilməsinə sərf olunur.
