Dünya şöhrətli müğənni Ariana Qrande ilə aktyor İtan Sleyterin yollarını ayırdığı bildirilir. Cütlüyün ayrılığı barədə məlumatı People jurnalına danışan mənbə təsdiqləyib. Məlumata görə, münasibət bir neçə ay əvvəl sakit şəkildə sona çatıb.
Mənbənin sözlərinə əsasən, tərəflər ayrılıq qərarını tələsik verməyiblər və uzun müddət düşünərək ortaq nəticəyə gəliblər. Buna baxmayaraq, Ariana və İtanın dost münasibətlərini qoruduqları və bir-birlərinə dəstək verməyə davam etdikləri vurğulanıb.
“Bu, tamamilə dinc ayrılıq idi. Onlar hər şeyi diqqətlə götür-qoy etdilər və yollarını ayırmağa qərar verdilər. Hələ də dostdurlar və bir-birlərinə hörmətlə yanaşırlar”, – deyə insayder bildirib.
Ariana diqqətini musiqi karyerasına yönəldib
Mənbənin iddiasına görə, Ariana Qrande hazırda özünü yaxşı hiss edir və bütün diqqətini yaradıcılığına yönəldib. Müğənni iyunun 6-da start verdiyi Eternal Sunshine turnesi ilə yanaşı, iyulun 31-də təqdim etməyi planlaşdırdığı Petal albomu üzərində də çalışır.
Son aylarda Ariana Qrande həm musiqi layihələri, həm də kino sahəsindəki uğurları ilə gündəmdə qalır. Xüsusilə “Wicked” film seriyasında canlandırdığı obraz sənətçinin karyerasında yeni mərhələ kimi qiymətləndirilir.
Ariana Qrande və İtan Sleyter ilk dəfə “Wicked” musiqili filminin çəkiliş meydançasında tanış olublar. Onların münasibəti 2023-cü ilin yayında başlayıb və bir müddət sonra ictimaiyyətin diqqət mərkəzinə düşüb.
Cütlük münasibətlərini rəsmi şəkildə təsdiqlədikdən sonra “Wicked” və “Wicked: Part Two” filmlərinin təqdimatlarında birlikdə görüntülənirdi. Ariana bir neçə müsahibəsində İtan Sleyter haqqında müsbət fikirlər səsləndirmiş, onu “möhtəşəm insan” adlandırmışdı.
Lakin görünür, şəxsi həyatlarında yeni mərhələyə qədəm qoyan məşhurlar münasibətlərini davam etdirməmək qərarına gəliblər.
