WhatsApp istifadəçilərin şəxsi yazışmalarını daha təhlükəsiz etmək üçün yeni funksiya üzərində işləyir. Məşhur mesencer yaxın gələcəkdə yalnız bir dəfə oxuna bilən mətn mesajlarının göndərilməsini mümkün edəcək yeniliyi sınaqdan keçirir.
Məlumata görə, funksiya əvvəlcə Android platformasında test edilməyə başlanıb, indi isə iOS versiyasında daxili sınaq mərhələsinə keçib. Yeni imkan sayəsində istifadəçi göndərdiyi mətnin qarşı tərəf tərəfindən yalnız bir dəfə açılıb oxunmasını təmin edə biləcək.
Yeni sistemdən istifadə etmək üçün mesaj göndərilərkən xüsusi seçim aktivləşdiriləcək. İstifadəçi göndər düyməsini basılı saxlayaraq “Bir dəfə baxmaq üçün göndər” funksiyasını seçəcək. Mesaj açıldıqdan sonra avtomatik olaraq söhbətdən silinəcək və yenidən görüntülənə bilməyəcək.
WhatsApp daha əvvəl foto, video və səsli mesajlar üçün oxşar məxfilik funksiyasını təqdim etmişdi. Hazırda şirkət həmin imkanın mətn mesajlarına da tətbiq olunması üzərində çalışır. Bu yenilik xüsusilə məxfi məlumatların paylaşılması zamanı əlavə təhlükəsizlik təmin etməyi hədəfləyir.
Sınaqdan keçirilən funksiya həm şəxsi yazışmalarda, həm də qrup söhbətlərində istifadə oluna biləcək. Bununla belə, kanallarda bu imkanın təqdim olunması nəzərdə tutulmur.
GSMArena-nın yaydığı məlumata əsasən, yenilik hələ açıq beta versiyasında əlçatan deyil və hazırda WhatsApp-ın tərtibatçı komandası tərəfindən yoxlanılır. Funksiyanın bütün istifadəçilər üçün nə vaxt istifadəyə veriləcəyi isə hələ açıqlanmayıb.
