L qrupunun əsas görüşlərindən birində Xorvatiya Qananı 2:1 hesabı ilə məğlub etdi. Bu nəticə sayəsində Balkan təmsilçisi 6 xalla ikinci pilləni tutaraq pley-offa vəsiqə qazandı. Qana isə 4 xalla üçüncü yeri tutdu və ən yaxşı üçüncü komandalar arasında yer alaraq mübarizəni davam etdirmək hüququ əldə etdi.
Xorvatiya ilk hissədə Petar Suçiçin qolu ilə hesabda önə keçdi. Fasilədən sonra Qana bərabərlik qolunu vursa da, oyunun sonlarında Luka Modriçin məhsuldar ötürməsini Nikola Vlaşiç dəqiq zərbə ilə tamamlayaraq komandasına qələbə qazandırdı.
İngiltərə Panamanı məğlub edərək qrup lideri oldu
L qrupunun digər qarşılaşmasında İngiltərə Panama üzərində 2:0 hesablı qələbə qazandı. İngilislər 7 xalla qrupu birinci pillədə başa vuraraq 1/16 finala yüksəldi. Panama isə keçirdiyi üç oyundan da məğlub ayrılaraq turnirlə vidalaşdı.
Matçın taleyi ikinci hissədə həll olundu. Əvvəlcə Harri Keyn hesabı açdı, beş dəqiqə sonra isə Cud Bellinqem fərqləndi. Bellinqem həm də Keynin qoluna məhsuldar ötürmə verərək görüşün ən fəal futbolçularından biri oldu.
DÇ-2026. L qrupu. 3-cü tur
Kolumbiya liderliyi əldən vermədi
K qrupunda Kolumbiya ilə Portuqaliya arasında keçirilən qarşılaşma 0:0 hesabı ilə başa çatdı. Heç-heçə Kolumbiyaya qrup liderliyini qorumaq üçün kifayət etdi, Portuqaliya isə ikinci pillədən pley-offa yüksəldi.
Görüş ərzində daha təhlükəli hücumlar quran tərəf Kolumbiya oldu. Cənubi amerikalılar bir neçə dəfə hesabı açmağa yaxın olsalar da, Dioqo Koşta etibarlı oyunu ilə seçildi. Əlavə vaxtda Kolumbiya topu qapıdan keçirsə də, VAR yoxlamasından sonra minimal ofsayd səbəbindən qol ləğv edildi.
DÇ-2026. K qrupu. 3-cü tur
