Naxçıvan Muxtar Respublikasında dövlət idarəçiliyinin optimallaşdırılması istiqamətində növbəti struktur dəyişikliyi həyata keçirilib. Qərara əsasən, iki dövlət qurumu birləşdirilərək onların bazasında yeni publik hüquqi şəxs yaradılıb. Dəyişiklik icbari tibbi sığorta, tibbi-sosial ekspertiza və əlilliyin müəyyən edilməsi sahələrində xidmətlərin daha mərkəzləşdirilmiş qaydada təşkilinə hesablanıb.
Yeni qərarla Naxçıvan İcbari Tibbi Sığorta üzrə Dövlət Agentliyi və Naxçıvan Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Tibbi-Sosial Ekspertiza və Reabilitasiya Agentliyi birləşdirilərək Dövlət Tibbi Sığorta və Ekspertiza Agentliyi publik hüquqi şəxsi yaradılıb.
Yeni agentlik hansı funksiyaları yerinə yetirəcək?
Yaradılan qurum Naxçıvanda icbari tibbi sığortanın tətbiqi və inkişafı, xidmətlər zərfi çərçivəsində tibbi xidmətlərin maliyyələşdirilməsi, icbari tibbi sığorta fondunun vəsaitlərinin idarə olunması, dövlət adından tibbi xidmətlərin mərkəzləşdirilmiş şəkildə satın alınması və ödənişlərin həyata keçirilməsi istiqamətlərində fəaliyyət göstərəcək.
Bununla yanaşı, agentlik:
- əlilliyin müəyyən edilməsi
- müddətli həqiqi hərbi xidmətə çağırılan vətəndaşların yekun tibbi müayinəsinin təşkili
- tibbi-sosial ekspertiza sahəsində dövlət funksiyalarının icrası kimi səlahiyyətləri də öz üzərinə götürəcək
Yeni qurum ləğv edilən hər iki agentliyin hüquqi varisi hesab olunacaq. Onların bütün hüquq və öhdəlikləri, həmçinin əmlakı Dövlət Tibbi Sığorta və Ekspertiza Agentliyinə veriləcək.
Bəzi səlahiyyətlər digər qurumlara ötürülüb
Qərara əsasən, sığortaolunan şəxslərin dərman preparatları və tibbi vasitələrlə təmin olunmasına dair hüquq və öhdəliklər Naxçıvan Muxtar Respublikasının Səhiyyə Nazirliyinə həvalə edilib.
Eyni zamanda, əlilliyi olan şəxslərə reabilitasiya xidmətlərinin göstərilməsi, eləcə də reabilitasiya müəssisələrinin idarə olunması Sosial Xidmətlər Agentliyinə verilib. Müvafiq müəssisələr də bütün əmlakı ilə birlikdə həmin qurumun tabeliyinə keçəcək.
Yeni agentliyə rəhbərlik üç nəfərdən ibarət İdarə Heyəti tərəfindən həyata keçiriləcək. İdarə Heyətinə sədr və onun iki müavini daxil olacaq. Qurumun maliyyələşməsi isə Naxçıvan Muxtar Respublikasının büdcəsi, icbari tibbi sığorta fondunun vəsaiti, eləcə də nizamnamədə nəzərdə tutulan digər mənbələr hesabına təmin ediləcək.
Qərar iyulun 13-də imzalanaraq həmin gündən qüvvəyə minib. Qeyd edək ki, bundan əvvəl Naxçıvanda aparılan institusional islahatlar çərçivəsində “Naxçıvan Təlim Mərkəzi” publik hüquqi şəxsin fəaliyyətinə də xitam verilmişdi.
