Yaponiya hökuməti robototexnika sahəsində milli strategiyasını yeniləyərək 2040-cı ilə qədər ölkədə təxminən 10 milyon robotun istifadəyə verilməsini hədəfləyib. The Register nəşrinin yazdığına görə, bu təşəbbüsün əsas məqsədi sürətlə qocalan əhali və işçi qüvvəsi çatışmazlığı səbəbindən yaranan kadr problemini aradan qaldırmaqdır.
Yeni strategiya ümumilikdə 18 istiqaməti əhatə edir. Prioritet sahələr sırasında qida sənayesi, səhiyyə, yaşlılara qulluq, istehsalat və xidmət sektoru yer alır. Layihənin icrası üçün hökumət süni intellekt əsaslı robototexnika mərkəzi yaradacaq. Bu mərkəz yeni texnologiyaların hazırlanması, sınaqdan keçirilməsi və genişmiqyaslı tətbiqinə dəstək verəcək. Strategiyanın əsasını Yaponiyada hazırlanmış Noetra adlı baza süni intellekt modeli təşkil edəcək.
Robotlar insanları əvəz etməyəcək
Yaponiyanın iqtisadiyyat, ticarət və sənaye naziri Ryosei Akazavanın sözlərinə görə, ölkə yaşlılara qulluq, təbii fəlakətlərə reaksiya, sənaye müəssisələri və “Fukuşima Daiiçi” Atom Elektrik Stansiyasının istismardan çıxarılması zamanı toplanmış təcrübədən istifadə edərək fiziki süni intellekt və robotlar üçün güclü məlumat infrastrukturu formalaşdıracaq.
Hökumət vurğulayır ki, robotların əsas vəzifəsi mövcud əməkdaşları işdən çıxarmaq deyil, uzun müddətdir doldurulması çətin olan vakansiyaları kompensasiya etməkdir. Xüsusilə səhiyyə və sosial xidmət sahələrində işçi çatışmazlığı getdikcə daha ciddi problemə çevrildiyindən avtomatlaşdırma praktik həll yolu kimi qiymətləndirilir. Bundan əlavə, proqram çərçivəsində robot texnologiyalarının inkişafı üçün iri sənaye şirkətləri və elmi müəssisələr arasında əməkdaşlığın genişləndirilməsi də nəzərdə tutulur.
Süni intellekt artıq dünyanın bir çox ölkəsində əmək bazarını dəyişməyə başlayıb. Avtomatlaşdırma xüsusilə təkrarlanan və rutin işlərdə insan əməyinə tələbatı azaltsa da, Yaponiya yeni strategiyada robotların insanlarla birlikdə çalışacağını və iqtisadiyyatdakı kadr çatışmazlığını aradan qaldıracağını ön plana çıxarır.
