İranın İslam İnqilabı Keşikçiləri Korpusu (SEPAH) ABŞ-ın İordaniya və Bəhreyndə yerləşən hərbi obyektlərinə pilotsuz uçuş aparatları ilə zərbələr endirdiyini bəyan edib. Qurumun yaydığı açıqlamaya görə, hücumlar ABŞ-ın İrana qarşı son hava əməliyyatlarına cavab olaraq həyata keçirilib. ABŞ tərəfi isə hücumların nəticələri ilə bağlı hələlik rəsmi məlumat yaymayıb.
SEPAH-ın məlumatında bildirilir ki, Bəhreyndə yerləşən “Şeyx İsa” aviabazasında yanacaq çənləri, anbarlar, texniki avadanlıq anqarları və hərbi yerləşmə məntəqələri hədəfə alınıb. Eyni zamanda, İordaniyadakı “Əl-Əzraq” aviabazasının aerodromu, texniki xidmət obyektləri və digər hərbi infrastrukturu da pilotsuz aparatlarla vurulduğu iddia edilir. Qurum bəyan edib ki, İranın təhlükəsizliyinə qarşı istifadə olunan istənilən hərbi obyekt gələcəkdə də cavab tədbirlərinin hədəfi olacaq.
Regionda gərginlik daha da artır
SEPAH bəyanatında həmçinin qeyd olunub ki, İranın milli maraqlarına qarşı yönələn addımlar yalnız Tehranla Vaşinqton arasındakı qarşıdurmanı dərinləşdirməyəcək, həm də ABŞ hərbi bazalarına ev sahibliyi edən region ölkələrinin təhlükəsizliyi və iqtisadi sabitliyi üçün əlavə risklər yaradacaq. Bu açıqlama son günlər Yaxın Şərqdə davam edən qarşılıqlı hərbi əməliyyatlar fonunda səsləndirilib.
Bundan əvvəl ABŞ ordusunun İran ərazisində bir sıra hərbi hədəflərə zərbələr endirdiyi, o cümlədən Əhvaz yaxınlığında raket hücumları nəticəsində ölən və yaralananların olduğu barədə məlumat yayılmışdı. Son hadisələrdən sonra beynəlxalq aviasiya qurumları region üzərində uçuşlarla bağlı xəbərdarlıqları genişləndirib, ekspertlər isə Yaxın Şərqdə gərginliyin daha da artacağı ehtimalını istisna etmirlər.
