Son günlər sosial şəbəkələrdə tanınmış reper Elşad Xosenin səhhətinin pisləşdiyi və onun Maştağada yerləşən Respublika Psixiatriya Mərkəzinə yerləşdirildiyi barədə müxtəlif iddialar yayılıb. Məsələ ictimaiyyət arasında geniş müzakirələrə səbəb olduqdan sonra həm tibb müəssisəsi, həm də Səhiyyə Nazirliyi məsələ ilə bağlı açıqlama verib.
Baku TV-nin əməkdaşı yayılan məlumatları dəqiqləşdirmək üçün Respublika Psixiatriya Mərkəzinə müraciət edib. Tibb müəssisəsinin nümayəndələri bildiriblər ki, sosial şəbəkələrdə və bəzi informasiya resurslarında yayılan xəbərlər həqiqəti əks etdirmir.
Nazirlik tibbi sirr qaydasını xatırlatdı
Səhiyyə Nazirliyinin Mətbuat Xidməti isə sorğuya cavabında bildirib ki, Azərbaycan qanunvericiliyinə əsasən şəxsin psixi sağlamlığı, eləcə də psixiatriya və narkoloji xidmətlərdən istifadə etməsi ilə bağlı məlumatlar tibbi sirr hesab olunur və dövlət tərəfindən qorunur.
Qurum vurğulayıb ki, hər hansı şəxsin psixiatriya və ya narkoloji tibb müəssisəsində qeydiyyatda olub-olmaması barədə məlumat üçüncü şəxslərə və ya kütləvi informasiya vasitələrinə təqdim edilə bilməz. Belə məlumatlar yalnız qanunvericilikdə nəzərdə tutulmuş hallarda, şəxsin razılığı və ya səlahiyyətli dövlət orqanlarının qanuni tələbi əsasında açıqlana bilər.
Beləliklə, Respublika Psixiatriya Mərkəzi sosial şəbəkələrdə yayılan iddiaları təkzib etsə də, Səhiyyə Nazirliyi qanunvericiliyin tələblərinə istinad edərək Elşad Xose ilə bağlı hər hansı fərdi tibbi məlumatı nə təsdiqləyib, nə də təkzib edib. Hazırda reperin özü və ya yaxınları tərəfindən də məsələ ilə bağlı rəsmi açıqlama verilməyib.
