ABŞ-ın Kaliforniya ştatından olan 39 yaşlı dənizçi Kayçi (Kai) Sato Sakit okeanda təxminən bir ay köməksiz vəziyyətdə qaldıqdan sonra sağ-salamat xilas edilib. Təkbaşına Havay adalarına üzmək üçün yola çıxan səyyahın yaxtasında gözlənilməz nasazlıq baş verib və bu, onun həyat uğrunda uzun mübarizəsinə çevrilib. Dənizçi nə yanacaq, nə rabitə, nə də kifayət qədər içməli su olmadan okeanda sürüklənməsinə baxmayaraq sağ qalmağı bacarıb.
Kayçi Sato iyunun 7-də Katalina adaları yaxınlığından ilk solo okean səyahətinə başlayıb. Təxminən iki həftə sonra yaxtanın dirəyi qırılıb, naviqasiya üçün istifadə etdiyi telefon isə sıradan çıxıb. O əvvəlcə mühərrik vasitəsilə Kaliforniya sahillərinə qayıtmağa çalışsa da, yanacağı tükənib və güclü okean cərəyanları onu planlaşdırdığı marşrutdan xeyli uzaqlaşdırıb.
Sağ qalmaq üçün qeyri-adi üsullara əl atdı
Dənizçinin sözlərinə görə, ilk günlərdə ümidsizlik içində olub və vəziyyətin çıxılmaz olduğunu düşünüb.
“Özümü axının aparıb uzaqlaşdırdığı çarəsiz bir ördək kimi hiss edirdim”, – deyə Kayçi Sato bildirib.
Sonradan o, PVC borular və kayak avarlarından istifadə edərək müvəqqəti yelkən hazırlayıb və yenidən gəmi marşrutlarına çatmağa çalışıb. İçməli su ehtiyatı tükəndikdən sonra vedrələrdəki dəniz suyunun üzərinə plastik torbalar çəkərək kondensat toplamağa başlayıb. Qida kimi isə əsasən yulaf sıyığı, həmçinin göyərtəyə düşən balıq və kalmarlardan istifadə edib.
İyulun 21-də Havay adalarından təxminən 900 mil məsafədə üzən M/V George III konteyner gəmisinin heyəti dirəyi sınmış yaxtanı görərək xilasetmə əməliyyatı həyata keçirib. Təxminən 90 dəqiqə davam edən əməliyyatdan sonra Sato təhlükəsiz şəkildə gəmiyə çıxarılıb.
Ona dərhal su, meyvə, yemək və tibbi yardım göstərilib. Hazırda yaxınlarının yanında bərpa olunan amerikalı dənizçi yaşadığı ağır sınağa baxmayaraq okean səyahətlərindən imtina etməyəcəyini bildirib. O, növbəti dəfə Filippinə üzməyi planlaşdırdığını, lakin bunun üçün daha böyük və etibarlı gəmi seçəcəyini deyib.
