Azərbaycan hökuməti 2026-cı ilin ilk altı ayında işğaldan azad edilmiş Qarabağ və Şərqi Zəngəzur iqtisadi rayonlarında bərpa və yenidənqurma işlərinin davam etdirilməsi üçün 1 milyard 64,1 milyon manat vəsait xərcləyib. Maliyyə Nazirliyinin açıqladığı məlumata görə, bu göstərici ötən ilin eyni dövrü ilə müqayisədə 31,45% az olsa da, illik büdcədə nəzərdə tutulan vəsaitin 30,4%-nin icrası deməkdir. Ayrılan vəsait sifarişçi qurumların təqdim etdiyi kassa sifariş sənədləri əsasında layihələrin maliyyələşdirilməsinə yönəldilib.
Bərpa proqramı çərçivəsində əsas diqqət nəqliyyat, yaşayış və kommunal infrastrukturun inkişafına yönəlib. Dövlət proqramı çərçivəsində yolların, yaşayış məhəllələrinin, enerji və su təchizatı sistemlərinin qurulması, eləcə də turizm və sənaye potensialının artırılması istiqamətində işlər davam etdirilir.
İnfrastruktur layihələri əsas payı təşkil edib
Ayrılmış vəsaitin böyük hissəsi infrastruktur layihələrinin icrasına sərf olunub. Bu istiqamətdə xərclər aşağıdakı kimi bölünüb:
- Avtomobil yollarının layihələndirilməsi, tikintisi və yenidən qurulması – 489,3 milyon manat
- Yeni yaşayış komplekslərinin layihələndirilməsi və tikintisi – 371,1 milyon manat
- Turizm infrastrukturunun yaradılması – 67,6 milyon manat
- Şuşa, Xankəndi və Laçında kanat yollarının layihələndirilməsi və tikintisi – 15,9 milyon manat
- Yaşayış məntəqələrinin elektrik təchizatı – 15,3 milyon manat
- Magistral su xətləri, yağış və tullantı kollektorları üzrə layihələr – 7,6 milyon manat
- Sənaye parklarında infrastrukturun yaradılması – 7,3 milyon manat
Ümumilikdə bu istiqamətlərə 974,1 milyon manat vəsait yönəldilib. Bundan əlavə, sosial təyinatlı layihələr üçün 29,8 milyon manat, minalardan təmizləmə işlərinə 45,3 milyon manat, müdafiə və hüquq-mühafizə obyektlərinin tikintisi və təmirinə isə 14,9 milyon manat ayrılıb.
Qeyd edək ki, 2026-cı il dövlət büdcəsində Qarabağ və Şərqi Zəngəzurda həyata keçirilən Böyük Qayıdış proqramı çərçivəsində yenidənqurma və bərpa layihələri üçün ümumilikdə 3,5 milyard manat vəsait nəzərdə tutulub. Bu proqram yaşayış məntəqələrinin bərpası, infrastrukturun qurulması və keçmiş məcburi köçkünlərin doğma yurdlarına mərhələli şəkildə qayıdışının təmin edilməsini əhatə edir.
