Azərbaycanda 2025-ci il üçün iş və istirahət günlərinin cədvəlində dəyişikliklər edilib. Bu barədə Daylinews-Az xəbər verir.
Müvafiq qərarı ölkənin Baş naziri Əli Əsədov imzalayıb. Sənədə əsasən, iş və istirahət günlərinin ardıcıllığını təmin etmək məqsədilə 27 və 28 mart iş günləri qeyri-iş günləri ilə əvəz olunub. Bunun əvəzinə 10 mart və 1 aprel iş günü elan edilib.
2025-ci ilin qeyri-iş günləri
Rəsmi təqvimə əsasən, 2025-ci ildə aşağıdakı tarixlər qeyri-iş günləri hesab edilir:
- 8 mart – Beynəlxalq Qadınlar Günü
- 20-24 mart – Novruz bayramı
- 30-31 mart – Ramazan bayramı
Qeyd edək ki, 8 və 23 mart şənbə gününə, 24 və 30 mart isə bazar gününə təsadüf etdiyindən 10, 25, 26 mart və 1 aprel əvvəlcədən qeyri-iş günü hesab olunurdu. Lakin yeni qərarla 10 mart və 1 aprel iş günü elan edilib, 27 və 28 mart isə qeyri-iş günü olub.
Beləliklə, Azərbaycanda 20-31 mart (daxil olmaqla) aralığında fasiləsiz 12 gün qeyri-iş günü olacaq.
