2026-cı il dünya çempionatında E və F qruplarında keçirilən növbəti oyunlar fərqli ssenarilərlə yadda qalıb. Kot-d’İvuar millisi son dəqiqə qolu ilə Ekvadoru məğlub edib, İsveç isə Tunis üzərində inamlı qələbə qazanaraq qrup liderliyinə yüksəlib.
ABŞ-ın Filadelfiya şəhərində yerləşən “Lincoln Financial Field” stadionunda keçirilən Kot-d’İvuar – Ekvador qarşılaşması gərgin mübarizə şəraitində keçib. Oyunun böyük hissəsində tərəflər hesabı aça bilməsələr də, son söz Afrika təmsilçisinə məxsus olub.
Matçın taleyini 90-cı dəqiqədə Amad Diallonun vurduğu qol həll edib. Hücumçunun dəqiq zərbəsi Kot-d’İvuara 1:0 hesablı qələbə qazandırıb. Ekvador qalan qısa müddətdə cavab verməyə çalışsa da, hesab dəyişməyib.
Bu nəticədən sonra Kot-d’İvuar E qrupunda Almaniyadan sonra ikinci pilləyə yüksəlib. Xatırladaq ki, qrupun digər görüşündə Almaniya Kurasaonu 7:1 hesabı ilə məğlub edib.
İsveçdən beş qolluq nümayiş
F qrupunun Monterreydə keçirilən İsveç – Tunis qarşılaşması isə tamaşaçılara bol qollu futbol təqdim edib. Skandinaviya təmsilçisi oyuna sürətli başlayaraq üstünlüyünü erkən qollarla nümayiş etdirib.
İsveç millisi rəqibini 5:1 hesabı ilə məğlub edərək mundiala parlaq start verib. Yasın Ayari iki dəfə fərqlənib, Aleksander İsak bir qol və iki məhsuldar ötürmə ilə komandasının əsas qəhrəmanlarından biri olub. Viktor Dyökereş də bir qol və bir assistlə yadda qalıb. Tunisin yeganə qolunu isə Rekik vurub.
Bu qələbə sayəsində İsveç F qrupunda ilk turun ardından zirvəyə yüksəlib. Qrupun digər matçında Niderland və Yaponiya 2:2 hesablı heç-heçə ediblər.
