Azərbaycan və Çin Xalq Respublikası arasında vətəndaşlar üçün vizasız səfərləri nəzərdə tutan müqavilə imzalanıb. Bu barədə Daylinews-Az məlumat yayıb.
Razılaşma 23 aprel tarixində Pekində, Azərbaycan Respublikasının Prezidenti İlham Əliyev və Çin Xalq Respublikasının Sədri Si Cinpinin iştirakı ilə baş tutan sənədlərin imzalanma mərasimi zamanı gerçəkləşib.
İmzalanan sənəd — “Azərbaycan Respublikası Hökuməti ilə Çin Xalq Respublikası Hökuməti arasında ümumi vətəndaş pasportlarının sahiblərinin vizadan azad olunması haqqında Saziş” adlanır.
Bu mühüm sənədi Azərbaycan tərəfindən xarici işlər naziri Ceyhun Bayramov, Çin tərəfindən isə xarici işlər naziri Van İ imzalayıblar.
Yeni qaydaya əsasən, Azərbaycan və Çin vətəndaşları hər iki ölkəyə vizasız səfər edə biləcəklər. Bu addım, iki ölkə arasında siyasi, iqtisadi və mədəni əlaqələrin daha da dərinləşməsinə şərait yaradacaq.
