Ukrayna Prezidenti Volodimir Zelenski Azərbaycan Respublikasının Prezidenti İlham Əliyevə Müstəqillik Günü münasibətilə rəsmi təbrik məktubu ünvanlayıb. Daylinews-az.com xəbər verir ki, məktubda iki ölkə arasında strateji tərəfdaşlığa, beynəlxalq əməkdaşlığa və Ukraynaya göstərilən dəstəyə xüsusi yer ayrılıb.
Təbrik məktubundan sitat
“Zati-aliləri!
Ukrayna xalqı adından və şəxsən öz adımdan Sizi Azərbaycan Respublikasının milli bayramı – Müstəqillik Günü münasibətilə təbrik edirəm.
Azad Ukrayna və Azərbaycan həmişə münasibətlərini qarşılıqlı hörmət, ümumi dəyərlər, dəstək və hərtərəfli əməkdaşlıq ruhunda inkişaf etdirməyə çalışıblar.
Əminəm ki, strateji tərəfdaşlıq münasibətlərinin dinamizmi təkcə qorunub saxlanılmayacaq, həm də Ukrayna və Azərbaycan xalqlarının maraqları naminə daha da möhkəmlənəcək.
Bu gün Ukrayna beynəlxalq ictimaiyyətin Rusiyaya qarşı mübarizədə göstərdiyi dəstəyi yüksək qiymətləndirir və Azərbaycanın bizim dövlətin suverenliyini və ərazi bütövlüyünü beynəlxalq hüququn əsas prinsiplərinə uyğun olaraq dəstəkləməsinə, həmçinin göstərdiyi humanitar yardıma görə təşəkkür edir.
Fürsətdən istifadə edərək, Sizə – hörmətli cənab Prezident, möhkəm cansağlığı və ali dövlət fəaliyyətinizdə uğurlar, dost Azərbaycan xalqına isə sülh, rifah və inkişaf arzulayıram.”
