ABŞ-ın Okean və Atmosfer Tədqiqatları üzrə Milli İdarəsinin Kosmik Hava Proqnoz Mərkəzi iyulun 5 və 6-na (şənbə və bazar günləri) geomaqnit aktivlik üzrə proqnozunu açıqlayıb. Mütəxəssislərin rəyinə görə, həftəsonu günəş fəallığı və maqnit qasırğası riski minimum səviyyədə olacaq.
K-indeksi və təsirləri
Geomaqnit qasırğalarının təsiri K-indeksi ilə ölçülür. Bu göstərici 2-dən 9-a qədər dəyişir: rəqəm nə qədər böyükdürsə, maqnit qasırğası bir o qədər güclü sayılır və insan sağlamlığına, texniki sistemlərə daha çox təsir göstərə bilər.
İyulun 5-i və 6-da gözlənilən K-indeksi 2–3 aralığında olacaq ki, bu da “yaşıl səviyyə” hesab olunur. Belə aktivlik zəif sayılır və insanların sağlamlığına ciddi təsir göstərmir.
Məlumatlar real vaxtda yenilənir
Qeyd olunub ki, günəş aktivliyi üzrə proqnozlar hər üç saatdan bir yenilənir. Astrofiziklərin sözlərinə görə, ən dəqiq proqnozlar bir günlük müddətə verilir, daha uzaq dövrə aid göstəricilər isə təxmini xarakter daşıyır.
