Məşhur sahibkar ABŞ-da yeni siyasi hərəkat başladır: “Azadlığınızı qaytaracağıq”
İlon Mask sosial şəbəkə platforması X-də keçirdiyi sorğunun nəticələrinə əsaslanaraq “Amerika” adlı yeni siyasi partiyanın yaradıldığını bəyan edib. Bu barədə Daylinews-az.com məlumat yayıb.
Mask paylaşımında bildirib: “2-yə 1 nisbətində siz yeni bir siyasi partiya istədiniz – və o, artıq mövcuddur. Ölkəmiz lazımsız xərclər və korrupsiya səbəbindən iflasa aparılır. Biz faktiki olaraq birpartiyalı sistemdə yaşayırıq, demokratiyada yox. Bu gün ‘Amerika’ partiyası azadlığınızı sizə qaytarmaq üçün yaradılıb”.
Sorğuda böyük maraq
Maskın təşkil etdiyi onlayn səsvermədə 1,2 milyondan çox X istifadəçisi iştirak edib və onların 65,4%-i yeni partiyanın yaradılmasına müsbət münasibət bildirib.
“Amerika” partiyası rəsmi qeydiyyat üçün sənədlərini təqdim edib
İlon Mask 6 iyul tarixində ABŞ Federal Seçki Komissiyasına (FEC) “Amerika Partiyası”nın (America Party, qısaldılmışı: AMEP) qeydiyyata alınması üçün rəsmi müraciət göndərib. Hazırda bu sənəd “emal olunmamış” statusu ilə reyestrdə yerləşdirilib.
Yeni partiyanın məqsədi
İlon Mask bu siyasi təşəbbüsün əsas məqsədini “ABŞ vətəndaşlarına azadlıqlarını qaytarmaq” kimi təqdim edib. O, ABŞ-ın mövcud siyasi sistemini tənqid edərək, ölkənin birpartiyalı rejimə sürükləndiyini qeyd edib və bu prosesə alternativ olaraq “Amerika” partiyasının yaradıldığını vurğulayıb.
